Ow’emyaka 23 ateirwe amashanyarazi yafeeraho omuri Isingiro.

N’ebya Beth Akatukunda

ISINGIRO

Omushaija w’emyaka 23 y’obukuru ateirwe amashanyarazi yaafa omu kyaro ekya Kyabinunga B omu muruka ogwa Kagarama omu disiturikiti eya Isingiro.
 
Samson Kasasira, Omugambirizi wa Pooriisi ahabw’ekyanga ekya Rwizi naagamba omugyenzi nka Silas Karuhanga obaire nakora emirimo ya riijariija omuri Isingiro beitu nazaarwa omu gomborora ya Mwizi omu disiturikiti eya Rwampala.

Nikigambwa ngu nyomwebazyo ebiro 11/01/2024 shaaha nka 6:30 z’eihangwe, omugyenzi atemire gumwe aha miti ebaire eri ahansi ya waaya z’amashanyarazi nikwo kugwera waaya ezi amashanyarazi gakahendera gamuteire kandi afeeriireho.

Kasasira naagira ngu Rwegasira Jennifer,63, omuhingi kandi obaire aine omugyenzi n’abandi bakozi omu musiri gwe omuri Kyabinunga niwe amanyiise Pooriisi ku Karuhanga yaateerwa amashanyarazi akafeeraho.

Nayongyeraho ngu Pooriisi ehikire aha mwanya ekihayo omutumbi ekagutwara omu kabafu ah’eirwariro erihango erya Mbarara kukyeberwa obwo okucondooza kurikugumizamu.

#WestUpdates