Ab’obushoborozi omuri Kiruhura bateireho Potoro z’ekiro kurwanisa ejwa.

N’ebya Abdulkarim Ssengendo

KIRUHURA

Disiturikiti ya Kiruhura eteireho entebeekanisa zigumire omuri okukora potoro z’ekiro burizooba n’ekigyendererwa ky’okurwanisa endwara y’ejwa (Foot and Mouth disease) omu disiturikiti egi.

Kiruhura n’emwe ahari za disiturikiti 36 ezirimu endwara y’ejwa omu eihanga. Za disiturikiti ezindi ez’omu kyanga ekya Ankole ezirimu endwara y’ejwa harimu; Isingiro, Kazo, Mbarara city, Mbarara district, Ntungamo na Rwampara.

Arikugambira omu rukiiko rw’akakiiko k’okurwanisa endwara y’ejwa aharwakana ebiro 08/02/2024, Ceeyamaani wa disiturikiti ya Kiruhura, Dan Mukago agizire ngu aha gomborora 14 eziri omu disiturikiti, egomborora 4 ezirimu Kashongi na Kitura nizo zitarikwikirizibwa kutambuza amatungo n’ebirikuruga omu matungo aga ahabw’okubarukaho kw’endwara y’ejwa.

Orukiiko oru rubaire rukuriirwe RDC, George Bakunda kandi rubaire aha kitebe kikuru kya disiturikiti.

Mukago naagira ngu egomborora 10 ezitarimu endwara y’ejwa nizikirizibwa kuguza amate n’ebindi ebirikuruga omu matungo beitu nizikirizibwa kupakiririra ente zaabo aha faamu honka kandi emotoka z’okwihayo ente ezo zishemeriire kubanza zaafuhirirwa zitakatahire omu faamu yoona. 

Nashaba abeebembezi n’abariisa boona omuri Kiruhura okukwatanisiza hamwe bakabaasa kurwanisa endwara y’ejwa.

RDC Bakunda, asiimire gavumenti ahabw’okutaho engyenderwaho nungi ezigyenderiire kurwanisa ejwa. 

Bakunda nabwo aragiire amagomborora goona okukuratira encwamu za kabineti aha kurwanisa ejwa.

Nabwo aragiire okukingwa kw’emyanya y’okupakiriraho ente kandi tihaine ente yoona erikwikirizibwa kutambura aha bigyere.

Amon Tayebwa, orikukurira eby’amatungo omuri Kiruhura agizire ngu obutare bw’amatungo bwona omu disiturikiti nibwija kuguma bukingire obwo disiturikiti erikugumizamu n’okwetegyereza embeera okuhisya obw’endwara y’ejwa erarangiirirwe ku etakiriho.

Diisi wa Kiruhura, Charles Kiberu nashaba abahangu omu by’oburiisa okukwatiraho disiturikiti n’okureeba ebiragiro byona ebiteirweho kurwanisa ejwa byateebwa omunkora.

#WestUpdates