Sheema eteire emihingo aha matungo ahabw’endwara y'ejwa.

N’ebya Bruno Mugizi

SHEEMA

Ab’obushoborozi omu disiturikiti ya Sheema eteireho emihingo aha matungo omu disiturikiti bwanyima y’okubarukaho kw’endwara y'ejwa (Foot and Mouth disease).

Dr.Amanya Joseph, Orikukurira eby’amatungo omu disiturikiti eya Sheema naagira ngu bariyo nibashwijuma n’okukyebera kumanya ahi endwara egi yahika omu disiturikiti.

Dr. Amanya naagira ngu okutambuza amatungo n’okuguza ebintu ebirikuruga omu matungo obwa hati tikurikwikirizibwa omu disiturikiti kandi eki kigyenderiire kurwanisa okujanjaara kw’endwara egi.

Okurugiirira ahari Dr. Amanya, disiturikiti ya Sheema ehandiikire ente zirikurenga omuri 200 ezaaherize kukwata endwara yeejwa.

"Tutandiikire kukyebera amatungo omu disiturikiti buri kaire, twine amatsiko ngu eki nikija kutuhwera kureeba oku endwara egi eriyo nejanjaara,” Dr. Amanya arikushoborora.

Naagira ngu ekireteire endwara egi yakanya omu disiturikiti ya Sheema n’ahabw’okubura omubazi gurikumara ogw’okusirika amatungo agarwire n’agatakarwire.

Nabaasa Joel, Orikukurira ebya production omuri Sheema naagira ngu ednwara yeejwa nejanjaara kurabira omu kuriisiza hamwe hamwe n’amatungo okunywera amaizi omu myanya erikushushana.

Ebyo bikiri aho, Marble Rubanza- omutuura wa Kyamurari south omu tauni kanso ya Bugongi ou ente ze 13 zikwatsirwe endwara yeejwa nashaba gavumenti okubateeraho oburyo ebatungire omubazi gw’okusirika amatungo n’okuhwera abariisa abu amatungo gaabo gateganisiibwe endwara egi.

#WestUpdates