Omukazi ateire omushaija we omuhini yamwita- Luuka

N’ebya Omushaki weitu

LUUKA

Omukazi omu disiturikiti ya Luuka abuzire bwanyima y’okwita omushaija we ou ateire omuhini gw’’eshekuro aha mutwe akafeeraho.

Sylvia Namugere, omukazi w’abaana 2 naagambwa kuba aitsire Muhammad Bavunaineki orikumanywa munonga nka Amos bwanyima y’ababiri kugira obuteikirizana.

Baariranwa baabo nibagira ngu abakundaine aba batwire baine obuteikirizana obwaretsirweho Namugere obutaheereza omushaija we ekitiinisa obaire bakira kuza kushemererwa na bataahi be akagaruka omuka ekiro.

Michael Kasadha, omugambirizi wa Pooriisi ahabw’ekyanga ekya Busoga North nashoborora ngu ababiri aba bagiizire obuteikirizana baatongana kandi omushaija acwiremu kuhunama nikwo kushohora omunju yaabo arikwenda kusigaho omukazi we.

Nayongyeraho ngu omukazi obaire akwise omuhini gw’eshekuro ayirukire aha mushaija we nikwo kumukwatira omu eishamba ry’ebikoijo akamuteera omuhini akamwita.

Kasadha naagira ngu bariyo nibahiiga Namugere obuzire obwo okucondooza kurikugyenda omu maisho.

#WestUpdates