Akakiiko k’eishengyero, karambura za SACCO z’emyoga, Mbarara City.

Eli Akiza
Abany’eishengyero abari aha kakiiko k’eishengyero akarikureebuuza eby’esente omu ihanga izooba eri baarambura za SACCO z’emyoga omu rurembo rwa Mbarara okureeba oku ziri kukozesa sente ezaabahairwe.

Obwa hati abany’eishengyero aba bariyo nibateera tooki omu mikorere ya za SACCO z’emyoga hamwe na Parish Development Model okwetooroora eihanga ryona.
Okwenda kwetegyereza gye emikorere ya puroguraamu ya Gavumenti ey’emyoga oku erikukora omu bantu ba buriijo, abany’eishengyero abari aha kakiiko k’eishengyero akarikusheruriza n’okucondooza eby’esente batandikire kutaayayira zimwe ahari za SACCO z’emyoga.
Aba nibagira ngu ekigyendererwa kyabo n’okukuratiriza sente ezi Gavumenti erikuha abantu kwetunguura kureebeka ngu zaakora omurimo ogu zigyendereire.

Abany'eishengyero b'akakiiko k'eby'esente hamwe n'abakazi n'abarikukora viinyo omu mizaabibu omuri Ibaare, Nyakayojo, Mbarara City. PHOTO: Eli Akiza

Aba baatayayira za SACCO ez’omuri Mbarara City ezirimu ey’abavugi ba taxi eya Mbarara City South Taxi Operators hamwe n’ey’abakazi abashuubuzi eya Mbarara City South Women Entrepreneurs.

Omu kwezi kwa 8 omugwa 2019, Gavumenti ekatongozaho puroguraamu y’emyoga okwetooroora eihanga ryona n’ekigyendererwa ky’okuhwera ebicweka 68 ahari 100 by’amaka omu ihanga okuruga omu kukorera enda yonka bakatandika kutunga entaasya y’okubaisaho amaka gaabo.

#WestUpdates