Abany’ishengyero batandikire kushwijuma ahakihandiiko ky’okuta omushoro aha mikula ya kanyabwengye.

N’ebya Umaru Kashaka 

Abany’ishengyero abaha kakiiko ka Paramenti ak’eby’esente batandikire kushwijuma ekihandiko ky’okuta omushoro gw’obucweka 5 ahari 100 aha buheereza bw’emikula ya kanyabwengye omu Uganda.

Okwezi okuhwaire, President Yoweri Museveni agarwize omu paramenti ekihandiiko ky’eby’omushoro gw’entaasya ekya Income Tax (Amendment) Bill, 2023 hamwe n’ekiragiro ekya Tax Procedures Code (Amendment) Act, 2023 kushwijuma omu bushoshoreki obumwe.

Aharwakabiri ebiro 04/07/2023, ba memba b’akakiiko baganiireho na minisita w’eihanga ow’eby’esente, Henry Musasizi n’abakuru kuruga omu minisiture ye kucwamu ekiine kukorwa omu kihandiiko eki.

Aba bacwiremu ngu omushoro gwa pacenti ya 5 guteebwe ahari za kampuni z’okuheereza obuheereza bw’aha mikula ya kanyabwengye ( Digital companies) barikugira ngu eki nikiija kuhwera gavumenti kurundana omushoro gwa biriyooni 5.

Purezidneti Yoweri Museveni akanga kuta omukono aha kihandiiko ky’eby’entaasya ekya Income Tax Bill kuba ekiragiro, arikugira ngu haine ebine kubanza byateerezibwamu.
Akashaba Paramenti okushwijuma akacweka aka 12 akarikugira ngu omushoro ogurabe gutarundiinwe omu mwaka gw’eby’esente gwine kwongyerwa aha mwaka gw’eby’esente ogundi.

#WestUpdates