Orubaju oruhakani okugiraho oruteerane rw’abeebembezi – Nambeshe

Orubaju oruhakani okugiraho oruteerane rw’abeebembezi – Nambeshe

N’ebya Ivan Tsebeni 

Ebibiina by’obutegyeki eby’orubaju oruhakani nibyija kugiraho oruteerane rw’abeebembezi baabo kubaasa kurondera omubazi obutaikirizana oburi omu bibiina kurugiirira ahari nyampara w’orubaju oruhakani omu eishengyero, John Baptist Nambeshe.

Nambeshe yaagira ngu enteekateeka z’oruteerane oru zaatandikire kandi nirwija kubaho omwaka ogu gutakahwaire.

Ogu yaagira ngu oruteerane oru nirwija kureeba omuringo gw’okuhezaho ebizibu ebi baine nk’orubaju oruhakani.

Ebiro ebihwaire, hatweireho obutaikirizana ahagati ya ba memba b’ekibiina ekya FDC n’abeebembezi b’ekibiina.

Abahangu omuby’obutegyeki nibagira ngu okwebaganisamu omu FDC kubaasa kuteganisa ebibiina ebindi eby’orubaju oruhakani.

Hariho obutaikirizana ahagati ya purezidenti w’ekibiina eki, Patrick Oboi Amuriat, Omuhandiiki mukuru w’ekibiina eki Nandala Mafabi hamwe n’omugambirizi w’ekibiina Ibrahim Ssemujju Nganda.

Wiiki ehwaire, Nandala Mafabi akahandiikira Sipiika w’eishengyero arikumumanyisa ku babingire Ssemujju ahabwa nyampara w’ekibiina omu eishengyero.

Beitu Sipiika Among ayangire okubingwa kwa Nganda obwo arikushaba Mafabi kuhayo obuhame bw’orukiiko oru bagizireho kumubinga.

#WestUpdates