Nga pulezidenti wa Kalungu, sijja kukkiriza bakozi ba Gav't kukola mirimu gadibengalye - Ssentebe Nyombi

Kino akyogedde ng'avungisa mu kitiibwa ky'ababaka ba Gavumenti nti bakola nsobi okweyita bapulezidenti b'ebitundu gye batumibwa.

Mukiibi abalung'amizza  nti Pulezidenti abeera omu mu ggwanga era bw'alondebwa takyusibwa okutuusa ng'amazeeko ekisanja kye eky'emyaka etaano.

Abadde RDC e Kalungu Pasta Caleb Tukaikiriza namuddidde mu bigere Paddy Kayondo n'amumyuka Miriam Kagiga Mugisha n'abalala ku mukolo

N'agattako nti bwe kiri ne ku Bassentebe ba disitulikiti n'amagombolola nti ekitali  ku ba RDC bo b'alondebwa Pulezidenti ng'abakyusakyusa w'ayagalidde n'olwekyo tebabeera Bapulezidenti kuba Pulezidenti abeera omu.

Akulira abakozi ba Gavumenti e Kalungu Andrew Ochen ng'ayogera ku lw'abalonzi be

"Wano e Kalungu, Nze pulezidenti waayo era ekisanja nkisigazaako emyaka ena  na buli ekikoleddwa nga kirungi oba kibi kibuuzibwa nze", Mukiibi bwe yakkaatiriza.

N'alabula nti nga pulezidenti wa Bannakalungu tajja kukkiriza bakozi ba Gavumenti kukola mirimo nnamasambala  kuba nabo enkya bakyusibwa ne batwalibwa mu bitundu ebirala.

Ssentebe wa NRM Hajji Twaha Kiganda Ssonko ngannyonnyola

Mukiibi agamba nti omukozi wa Gavumenti akyusiddwa tagenda na mirimo gitatuukidde gyalese akoze kyokka vvulugu we  amulekera Ssentebe n'abakiise okumwanukulira ebibuuzo mu balonzi nga babassa ku nninga z'okulya ssente z'omuwi w'omusolo.

Ajjulizza ekizimbe ky'ekitebe kya disitulikiti nti abaakisimira omusingi baagunafuya ne kiggyamu enjatika mu bbanga ttono nti naye abaabikola baatambulamu dda kyokka ekizimbe kyasigalawo ku kya Bannakalungu.

Abamu ku bakozi ba Gavumenti e Kalungu ku mukolo

Mukiibi agamba nti ekizimbe yakiwagiseemu empagi zikisobozese okuwanirira omwaliiro ogusooka gwe batandise okuzimba naye era wansi enjatika zikyalimu.