Omumyuka wa Katuukiro wa Busoga owookubiri, Osman asitudde ebikonge ku mbaga ya mutabani we, Laba ebifaananyi

Bya Donald Kiirya

Omumyuka wa Katuukiro wa Busoga owookubiri, Osman Noor Ahmed asitudde ebikonge ebiwerako ebyetabye ku mukolo ogw’okuwoowa mutabani we ne mwana munne e Jinja.

 Osman ng'ono mutabani w'omumyuka wa Katuukiro wa Busoga owookubiri, Osman Noor Ahmed, yatuukidde mu mmotoma ekika kya Toyota Land Cruiser V8 ku mukolo ogwa Nikka ogwetabiddwaako abasajja bokka ogwabadde mu kizimbe omwali banka ya Orient e Jinja.

Omugole Omusajja Osman (akutte Omugo Wakati) Ng' Ali Ne Bavubuka Banne Abamuwerekeddeko Ku Mbaga Ye.

Osman Noor Ahmed (ku Kkono) Nga Yeetegerezza Engeri Gyebabadde Basiba Mutabani We Osman (wakati) Nikka Nga Omukolo Gwakoleddwa Kitaawe W'omuwala Sheikh Abdallah (ku Ddyo.

Omugole Omukazi Fardausa Osman Bweyalabise Ku Mukolo Gwe

Osman Noor Ahmed (ku Ddyo) Ng'ali Mu Ssanyu Ne Alhaji Habib Kagimu (ku Kkono) Ku Nikka Ya Mutabani We.

Katuukiro Wa Busoga Dr. Joseph Muvawala (ku Ddyo) Nga Bamugabula Emmere Ku Mbaga E Jinja.

Abagole Nga Basala Keeke

Kasule Lumumba Ng'abalaga Ky'alinawo

 Bwe baabadde ku mukolo, disitulikiti Khadi wa Jinja, Sheikh Ismail Adi Basoga yasoose na kwanjula ba disitulikiti Khadi ab’enjawulo abeetabye ku mbaga era n’asaba Allah awe abagole omukisa ogw’okutambuza amaka amalungi n’okugakulaakulanya.

 Ye regional Khadi wa Busoga, Sheikh Hussein Bowa, yategeezeza nti omwana ow’obulenzi mu maka okugattibwa mu bufumbo obutukuvu kyekimu ku buvunaanyizibwa obulina okutuukirizibwa abazadde mu maka.

Bowa yasabye abazadde bakolelere abaana baabwe aboobulenzi n’abawala okusobola okutuuka ku mikolo egy’okubagatta.

 Omumyuka wa Katuukiro wa Busoga owookubiri Osman Noor Ahmed yasiimye abagenyi abazze ne beetaba ku mbaga ya mutabani we era n’abaagaliza okutambula obulungi nga baddayo mu maka gaabwe.

Oluvannyuma yakwasizza kitaawe w’omugole omuwala Fardausa ayitibwa Sheikh Abdallah amahare ga doola 6,000.

 Omumyuka wa Katuukiro asooka Polof. Dr. Muhamadi Lubega yasiimye Osman Noor Ahmed olw’okukwatirako mutabani we n’asobola okukola omukolo nga ogwo.

 Oluvannyuma yayise Katuukiro Muvawala eyakuutidde abagole buli omu okubeera omwesimbu eri munne n’okukulembeza Katonda mu byebakola.

 Yatuusizza okulamusa okuva eri Kyabazinga wa Busoga, William Gabula Nadiope IV eri abagole.

Omumyuka Wa Katuukiro Wa Busoga Ow'okubiri Osman Noor Ahmed (ku Ddyo) Ne Mukyala We (wakati) Nga Batuuka Ku Mukolo Ogw'okusiba Mutabani Waabwe Nikka E Jinja.

Salaamu Musumba Ne Justine Lumumba Kasule (owookubiri Ku Kkono) Nga Bazina N'omumyuka Wa Katuukiro Wa Busoga Ow'okubiri Osman Noor Ahmed.

Omukolo ogwa Nikka olwawedde, olwo ne bategeka omukolo ogw’omugole omukyala mu kifo kyekimu nga guno gwetabiddwaako abakyala bokka okwabadde Justine Lumumba Kasule, Salaamu Musumba n’abalala.

 Omugole omukyala Fardausa Abdillah Osman yajjidde mu kiteeteyi amatiribona ekimyuufu era oluvanyuma yeeseguddemu n’agenda n’akyusa n'ayambala gawuni n’akomawo ne bbaawe Osman.

 Abantu babawadde ebirabo bingi era abagole b’asazze keeki gye bagabudde abagenyi ababadde ku mukolo. Osman Noor Ahmed oluvannyuma yakwasizza abamu ku bagenyi abayite keeki zaabwe ezaatoneddwa abagole

Kino bwe kyawedde ne badda mu ddiiro ne basumulula ddansi ne beegattibwako Lumumba, Musumba n’abagenyi abalala.