Abatuuze ku mwalo gwe Mawoto basattira lwa kirwadde ky’akafuba

Bya Eric Yiga

ABANTU  ababeera ku mwalo gw'e Mawoto  mu  ggombolola y'e Mpatta  mu  disitulikiti  y'e Mukono bali mu kusattira olw’ekirwadde ky’akafuba okweyongera mu kitundu ne balaajanira abakulembeze baabwe okuvaayo ku nsonga eno.

Okusinziira ku  ssentebe  w'ekyalo  kino, George William Lwanga ekirwadde kino kyeriisa nkuuli mu kitundu kyabwe.

Agamba nti kuno kwegattiddwaako n’ebilwadde ebirala, kyokka nga bakyalina okusoomozebwa olw’obutabeera na ddwaaliro lya gavumenti mu kitundu ng’ate eddala eriri ku mutendera gwa Health Center 111 erisangibwa e Kabanga liri wala nnyo ekiwadde omukisa ekirwadde kino okubatigomya.

Bano  basinzidde  mu  lusiisira lw'ebyobulamu  olukubidddwa mu  kitundu  kino  okujjanjaba  abakadde n’abalina  obukosefu  era ng'eddwadde  okuli;  akafuba,  akawuka  akaleeta  mukenenya,  sukaali, puleesa  zisoosowaziddwa.

Omubaka W'ekitundu Fred Kayondo Ne Banne

Abatuuze bagamba nti  ekisinga  okubamalamu  amaanyi  kwe kwewaliriza  oluusi ne batambuza  ebigere okugenda mu ddwaaliro lino   kyokka  abasawo  ne babategeeza  nga bwewatali ddagala.

Richard  Omolo ono  nga yakulira abasawo b’oku byalo ( VHT)   mu  ggombolola agamba nti obumu ku buzibu bwe basinze okusanga be basawo obutakomyawo ebivudde mu musaayi,  ate abamu baweebwa bifu.

Beemulugunya nti n’abajja okuwa abantu obujjajjabi balwawo okudda  ate olumu n’entambula emanyi okukaluba  ekiviirako  n'obulwadde okukona.

Omu Ku Bakadde Abeetabye Mu Lusiisira Lw'ebyobulamu Ng'aliko By'annyonnyola Omusawo.

Omolo  akirambise ng'okugabana  eccupa, enseke z’amalwa n’ebiringa ebyo bye bimu ku bivuddeko ekirwadde ekirwadde ky'akafuba okweriisa enkuuli.

Fred Kayondo, nga ye Mubaka w’ekitundu kino m upalamenti   abasuubiza  nga  bw’agenda  okubanja  gavumenti eddwaaliro wabula  n'abasaba  okukwatira  awamu  bateme evvuunike  okutandika  eddwaaliro.

Kayondo  ategeezezza  nti  okusinziira ku  lipooti  y’abasawo,  abantu  abakebeddwa  eddwadde ezisinga  ezizuuliddwa  zeekusa ku mazzi  amajama.

Ono ategeezezza nti n’ekirwadde ky’akafuba bwe kyeyongedde naye nga   kyekuusiza  ddala  ku  kawuka  akaleeta  mukenenya  bw'atyo  n’abakubiriza  obutaggwamu ssuubi bejjanjabise.