Odongo amezze Pasita Kyazze ku ky’okukulembera abalokole

ABALOKOLE balonze Bisopu Moses Odong okukulembera ekibiina omwegattira ekkanisa z’abalokole ekya National fellowship of Born-Again Pentecostal churches (NFBPC).
Odong yamezze Michael Kyazze mu kalulu akaabadde ak’ebbugumu.
Ekifo kino kibadde kivuganyizibwako abasumba bataano wabula nga bonna Odong yabaleebezza n’obululu 709, paasita Michael Kyazze yafunye obululu 263, Fredrick Semazzi - 10, Joseph Nsubuga - 63 ate George Oduchu n’afuna obululu 30.
Okulonda kuno kwabadde ku MTN Arena e Lugogo mu Kampala ku Lwokuna nga kwabadde kwa kyama nga akalulu kaakusuula mu bbookisi era nga kwetabiddwaamu abalonzi 1,100 abaakiikiride bannaabwe okuva mu makanisa agasobye mu 10,000 okwetooloola eggwanga.
Apostle Rodgers Darlington Zziwa ye yakulembedde okulonda kuno era nga yalangiridde Odong nga omuwanguzi n’amukuutira okuweereza abakkiriza, okubakumaakuma n’okubawabula awatali kubaawulayawulamu.
Odong yeebaziza basumba banne olw’okumussaamu obwesige era n’akakasa nti ebimu ku by’agenda okutandikirako kwe kulaba ng’abasumba tebatunuulira kulyowa myoyo kyokka wabula beenyigire ne mu mirimu emirala nga obulimi, obulunzi n’ebirala basobole okweyimirizaawo n’okuddukanya ekkanisa awatali kukaluubirizibwa kwonna.
Bisopu John Kabuye ye yalondeddwa okumyuka Odong ng’ono teyakubiddwaako kalulu wabula yayiseewo butereevu.
Ebifo ebirala ebyalondeddwa kwabaddeko ekya ssaabakunzi nga kino kyawangudwa paasita Joshua Kirabira, Richard Mabongo yalondedwa ku kifo ky’omwogezi, pasita Olive Janet Gidudu yawangude eky’obuwanika ate Bisopu Africano Magezi n’alondebwa ku ky’omuwandiisi.
Abalondeddwa ekisanja kyabwe kyakumala ebbanga lya myaka 5 nga baakufuga okuva mu 2023 okutuuka mu 2028.
Wadde nga waabaddewo okutaataaganyizibwa kw’abalonzi okuva mu kifo ekimu okudda mu kirala we baabadde balina okulonda, okutwaliza awamu kwabadde kwa mirembe.
Abeebyokwerinda baabaddewo mu bungi era nga baayambyeko okuluhhamya n’okukuuma obutebenkevu.
Akalulu kano kaatandise ku ssaawa 2:00 ez’oku makya ng’abeesimbyewo baasoose kweyogerako nga buli omu annyonnyola kw’atandikira.