Abakristaayo badduse egy'okuzimba ekizimbe kya Mother's Union e Namirembe

ABAKRISTAAYO mu Bulabirizi bw'e Namirembe baakung’aanye mu bungi okwetaba mu misinde mubunabyalo ejaategekeddwa Obulabirizi bw'e Namirembe mu kaweEfube w'okusonderako ssente z'okuzimba ekizimbe kya Mother's Union.

Bingi ng'ayozayoza Jordan Mulinda olw'okuwangula emisinde gya kkiro mmita 21.

Emisinde gino gyabaddewo ku Lwomukaaga ERa gyasimbuddwa Omulabirizi w'e Namirembe, Moses Banja mu bimuli bya Lutikko eri abaddusi abadduse kkiromita 21, 10, 5 ssaako naabo abatasobola kudduka abaatambudde kkiromita 3.

Omulabirizi Banja ng'ali wamu n'abalabirizi abalala okuli owa Luweero Wilson Kisekka ssaako owa Mityana James Bukomeko, ku ssaawa 1:00 ez'oku makya baasimbudde abaddusi abaabadde banekaanekanye mu bujoozi bwa bbululu n’ekkala enjeru.

Bp, Banja bwe yabadde asimbula abeetabye mu misinde.

Banja yasiimye nnyo bonna abeetabye mu misinde gino n’agamba nti obuwagizi bwe balaze ssaako okwetaba mu misinde biwa amaanyi nti pulojekiti y'okuzimba ekizimbe ejja kutambula bulungi.

Ye akulira ekibiina kya Mother's Union mu bulabirizi bw'e Namirembe yategeezezza nti ekizimbe kino basuubira okukizimbira mu bbanga lya myaka 4 era nga kyonna kya kuwemmenta obuwumbi 12.

Yagambye nti mu kiseera kino banoonya obukadde 500 okutandika ku mwaliro ogusooka, nti guno gwe gugenda okubawa amaanyi okuzimba emyaliriro emirala okusinziira nga bwe kiri mu ppulaani.

Abamu ku beetabye mu misinde gino nga basimbula okudduka.

"Ekizimbe kyayimirira emyaka 4 emabega olw'ebizibu by'ensimbi ebyaliwo, kyokka tulina okukkiriza nti tugenda kuddamu buto okuzimba, era tusuubira nti nga tukwatidde wamu ng'Abakristaayo n’abantu abalala, tujja kumalako." Bingi bwe yayongeddeko.

Yategeezezza nti ekizimbe nga kiwedde, basuubira nti ssente ezinaavaamu zigenda kuba ziyamba ku mirimu gy'ekibiina okuli okubuulira enjiri, okuyamba amaka agalimu obutabanguko ssaako n’ebirala okusinziira ku mulamwa gw'ekibiina.

Bingi yagambye nti emisinde gigenda kubeerawo buli mwaka nga egisooka baagitongozza ku Lwomukaaga, n;asaba abantu okwongera okujjumbira enteekateeka z'ekibiina ate n'abakyala bafube okuyingira ekibiina kino bafuuke b mmemba abajjuvu.

Jordan Mulinda ye yawangudde emisinde gya kkiromita 21, Herbert Asiku n’awangula eja kkiromita 10 ate nga Edward Kiyingi yawangudde eja kkiromita 5.

Bano bonna bakwasiddwa emidaali okuli n’abo abaakutte eky'okubiri n'ekyokusatu. Okusinziira ku nteekateeka, obussabadinkoni bw'e Nateete bwaweereddwa ekikopo olw'okuba nti bwe bussabadinkoni obwasinze okusonda ssente.