Omulamuzi avudde mu gwa Paasita Male ne Mabiriizi
OMULAMUZI wa Kkooti Enkulu e Mukono, Christine Kaahwa agaanye okuwulira omusango gwa looya Male Mabiriizi, Pr. Solmon Male gwe yateekayo ng’ajulira ku by’okubakebera DNA.
Mabirizi n'Omusumba Male
Bya Alice Namutebi
OMULAMUZI wa Kkooti Enkulu e Mukono, Christine Kaahwa agaanye okuwulira omusango gwa looya Male Mabiriizi, Pr. Solmon Male gwe yateekayo ng’ajulira ku by’okubakebera DNA.
Fayiro yali eweereddwa Omulamuzi Kaahwa kyokka eggulo yagivuddemu nga tawadde nsonga yonna. Yagisindise ew’omuwandiisi wa kkooti balonde omulamuzi omulala awulire omusango guno.
Fayiro eno kati yaweereddwa Omulamuzi David Matovu akulira Kkooti Enkulu e Mukono.
Dna Test
Nga balinda okuwulira okujulira kwa Paasita Male, ate Mabiriizi yataddeyo naye okujulira ng’agamba nti Omulamuzi wa kkooti eya wansi Paul Matyama yakola nsobi okugaana okuziikula omulambo gwa kitaabwe Hajji Mohammed Bazinduuse Lulibedda Mutumba kwe baba babakeberera DNA.
MabirIizi ye yaloopa omusango era eky'okugenda ku DNA akiwagira naye agamba nti kirina kukolebwa ku kitaabwe Mutumba bamuggyeko akagumba kwe baba basinziira.
Paasita Male ekya DNA akiwakanya ng’awa ensonga nti ekiraamo ky'omugenzi weekiri tekyogera ku Mabiriizi ate omugenzi yababuulira nti Mabirizi si y’amuzaala.
Olutalo lwa Mabirizi ne Male lwatandika baganda be bwe bagoba Mabiriizi ewa kitaawe e Wakaliga Lubaga nga bagamba nti si mwana wa kitaabwe.
Mabiriizi yabaloopa mu kkooti ng’ agamba nti batyoboola eddembe lye ery'okubaako famire n'obuwangwa mw’agwa n’asaba kkooti eragire bonna abeeyita abaana b'omugenzi bagende ku DNA amazima gaveeyo.
Male ne baganda be abalala abaayabya olumbe lwa kitaabwe buli omu n’afuna omugabo naye kkooti byonna yabisazaamu