Yiino fayiro ku baatwala ebyobugagga bya Dr. Kiyingi

Bya Ponsiano Nsimbi

FAYIRO omuli amannya g’abantu ab’enjawulo abeekomya emmaali ya Dr. Aggrey Kiyingi mu biseera we yaleppukira n’emisango egy’okutta mukazi we eyasooka Robinah Kiyingi, Bukedde agizudde ng’erimu ebiwuniikiriza!

Ebintu bya Dr. Kiyingi ebyatwalibwa byali bibalirirwamu obuwumbi obusoba mu 15, byonna bamafia baabyegabanyamu nga beeyambisa kkooti.

Okusinziira ku fayiro ey’ekyama Bukedde gye yalabyeko, ddiiru ey’okutwala ebintu bya Kiyingi baagiyisa mu ndagaano egambibwa nti Dr. Kiyingi yagikola n’omukyala Diana Jackline Asiimwe eyamuwawaabira ng’amuvunaana obutasasula ssente obukadde 70 eza ssementi.

Wabula waliwo ebibuuzo eby’enjawulo ebikyebuuzibwa nakati kuliko engeri Dr. Kiyingi gye yakola endagaano n’omukyala ono ng’ali mu kkomera.

l Engeri omukono gwa Dr. Kiyingi gye gwatuuka ku ndagaano eno. Mu kunoonyereza okwakolebwa poliisi n’abakugu mu by’okuwandiika baakizuula nti omukono guno gwali mujingirire kyokka yadde bino byonna byategeezebwa kkooti omulamuzi yagenda mu maaso n’asala omusango n’alagira ebintu bya Dr. Kiyingi okutundibwa.

l Engeri obukadde 70, obwali mu ndagaano y’ebbanja gye bwakola amagoba okutuuka mu buwumbi 5 mu kiseera emmaali ya Dr. Kiyingi mwe yatundibwa mu 2013.

l Engeri Dr. Kiyingi gye yaggulwako omusango ne gusalibwa awatali kuweebwa mukisa kwewozaako era kkooti n’eragira ebintu bye okutundibwa nga taliiwo.

l Engeri eyali omukozi we Charles Barwanaho Kariisa gwe baali bamuvunaana naye omusango gw’okutta mukyala we gye yafuna obuyinza okuddukanya ebyali ebyobugagga bya Dr. Kiyingi ku lwa Asiimwe agambibwa nti yali abanja Dr. Kiyingi obukadde 70.

l Enkola kkooti gye yayitamu okutundu ebintu bya Kiyingi nga Asiimwe ayogerwako ng’eyali abanja Dr. Kiyingi nga talabiseeko mu kkooti.

l Engeri kkooti ne poliisi gye yagaana okuddamu okwekenneenya ebyali mu kwemulugunya kwa Egesa eyali aweereddwa obuyinza okulabirira ebyobugagga bya Kiyingi mwe yawakanyiza endagaano egambibwa nti yali njingirire.

l Engeri ssente gye zaakula okutuuka ku buwumbi 5 n’ebirala.

l Omusango gw’ebbanja ogwaggulwa ku Kiyingi okuggulwawo oluvannyuma lw’omwaka Mulamba nga Dr. Kiyingi avudde mu kkomera era ng’amaze n’okudda mu Australia gye yali akolera.

l Engeri ebintu bya famiire ya Dr. Kiyingi okuli n’ettaka lya famiire ya kitaawe gye lyatwalibwa bamafia.

SSENTE EZATUNDIBWA MU BY’OBUGAGGA BYA DR. KIYINGI
1.Ettaka ku block 273 poloti48 Buziga lyatundibwa 795,000,000/=
2. Ettaka ku block 273 poloti 141/142 lyatundibwa 330,000,000/=
3. Ettaka ku block 158 poloti18,23,25 ne 27 e Namulonge lyatundibwa 810,000,000/=
4. Ekibanja ku block 273 poloti 35 Circular Rd Buziga baalitunda ku 300,000,000/=
5. Endagano zino zaakolebwa October 18,2013 wakati wa bannyondo ba Kenneth Mabondo owa T/s Bailiff Masters Ltd ne Amdan Khan.
6. Okukyusa ebyapa ebibalirwamu 2,235,000,000 n’ebirala.