Town Clerk w’e Nakawa afunye embiro bw’ayitiddwa mu kakiiko okujja okwennyonnyolako

Bya  Edith Namayanja

ABABAKA ku kakiiko ka palamenti akalondoola eby’enzimba basese oluvannyuma lw’okutegeezebwa nti Town Clerk wa divizoni y’e Nakawa, Dennis Omondi yatidde okujja mu kakiiko ng'atya okusibibwa ekyamuviriddeko n’okufuna embiro .

Kisaka Ne Ying. Luyimbazi Nga Beetegereza Ebbaluwa Asembayo Ku Kkono Ye Ying. Justus Akankwasa

Bino okutuukaawo kiddiridde abakulu mu KCCA okubadde: Dorothy Kisaka ne Ying. Justus Akankwasa avunanyizibwa ku by’enguudo okwegaana ebbaluwa bbiri ezireeteddwa mu kakiiko nga ziraga nga KCCA bwe yawa omugagga wa Forest Mall Stanislaus Isiagi olukusa okuzimba ekizimbe waggulu ku mwala ogutwala amazzi mu kifo kino.

Ebbaluwa zino zibaddeko omukono gwa Omondi n’abalala okuli: Edrine Odur wamu ne Paul Musibira nga kiraga nti baawako kkoppi eri abakulu mu KCCA wabula nga Kisaka agambye nti ye tazimanyiko yadde.

Ekitabudde ababaka okubadde: Fred Kayondo owa Mukono South ne Maurice Kibalya owa Bugabula South ye Ying. Akankwasa naye okutegeezza nti ebbaluwa tazimanyiiko kubanga waliwo emitendera gye baali baalagira omugagga okuyitamu era ne basaba okufuna “renovation permit” okutereeza ekizimbe kye nga eby’okumuwa olukusa ate okuzimba tebabimanyiiko.

Wabula minisita omubeezi owa Kampala Kabuye Kyofatogabye olukubidde Omondi amutegeezza nga bw'afunye embiro nti tayinza kulabikako mu kakiiko olwaleero  ezisesezza ababaka okujula okufa enseko.