EBYA MUBAJJE BIBI: Abalala ababanja obukadde 2,480 nabo basitudde enkundi

EBYA Mubajje tebinaggwa, kkampuni ya balooya ezimu ku zisinga okutiibwa olw’okuwoza emisango egy’amaanyi, batutte Mufti mu kkooti leero nga baagala abasasule obuwumbi bubiri n’obukadde 480 ze babanja ekitebe ky’Obusiraamu ekya UMSC.
Kkampuni bbiri okuli eya MMAKS Advocates ne Makeera and Company Advocates be batutte UMSC mu kkooti Enkulu ey’ebyobusuubuzi nga baagala ebasasule obuwumbi bubiri n’obukadde 485.
Kkooti yalagidde aba UMSC okulabikako leero mu kkooti Enkulu ey’obyobusuubuzi ku ssaawa 6:30 ez’omu ttuntu beewozeeko ku misango gy’obutasasula egibavunaanibwa.
Kkooti yalabudde UMSC nti singa eremwa okuwa ensonga ematiza, bajja kuyisa ekiragiro ekibowa ebyobugagga by’Obusiraamu bitundibwe ku nnyondo oba okulagira abakulira ekitebe ky’Obusiraamu bakwatibwe.
Olukiiko olufuzi olwa UMSC olukulemberwa Mufti Mubajje balulanga kulemwa kusasula kkampuni za balooya abaabawolereza mu misango egyenjawulo.
Omusango ogwaloopeddwa guli nnamba 0729 of 2023 nga guva mu mirala egyasooka okwali ogwa Taxation ogwa No. 1128/374 of 2022 ne Court of Appeal Civil appeal No. 51 of 2016. Emisango gyonna gisibuka mu musango oguli ku namba No 318 of 2021.
nabo basitudde enkundi
Mu 2001, UMSC yawawaabirwa kkampuni enzimbi eya Concorp International Limited eyali enzimbi nga baagala ebaliyirire ssente 53,770,654,800/=.
Kkampuni ya Concorp ye yasooka okuweebwa kontulakiti y’ekitebe kya UMSC. Kyokka eyali omukulembeze wa Libya Muhamar Gaddafi bwe yakkiriza okuzimba omuzikiti omunene era nga y’agenda okusasula ssente zonna, bwetyo kontulakiti ya Concorp n’ebaggyibwako.
Nga December 22, 2015, kkooti yagoba omusango gwa Concorp era n’ebalagira okuddiza Gavumenti ssente ezibalirirwamu obukadde bwa America bubiri n’emitwalo 24. Zino zaabalirirwa nga zaali ziyita mu ze baalina okufuna.
Nga February 3, 2016, kkampuni za balooya zaateekamu okusaba mu kkooti nga baagala basasulwe ssente ze baakolera ekintu kkooti kye
BAATUUKA BATYA OKUBANJA
yakkiriza era n’eragira basasulwe engassi ya bukadde 522 era n’abala n’omusolo gwa VAT gwa bukadde 94.
Balooya bagamba nti nga September 2016, baawandiikira UMSC nga babasaba babasasule ssente ze baakolera. Bwe baalemwa okubasasula baddayo mu kkooti eyalagira basasule nga muteekeddwamu n’engassi okusinziira ku bbanga lye baali bamaze nga babanja.
Wadde nga mu kusooka aba UMSC baategeeza kkooti nti balooya ababanja tebabagambangako kubawolereza, kyokka kino kkooti yakikubamu ebituli oluvannyuma lw’eyali Ssaabawandiisi, Ramathan Mugalu okukkiriza nga bwe baali baabawaako obukadde 40 ku ssente ze baakolera.
Ssente ezibanjibwa zaabaliriddwa nga mwongeddwamu amagoba n’engassi ku misolo okutuuka ku buwumbi bubiri n’obukadde 485 ezibanjibwa okuva lwe baasemba okusala omusango guno nga February 14, 2018.
Emisango egiwawaabirwa UMSC gyeyongera buli olukya nga ku Mmande, balooya Abasiraamu abeegattira mu kibiina kya Uganda Muslim Lawyers Association nga bayita mu bannamateeka ba M/S Nalukoola Advocates and Solicitors baaloopye Mufti Mubajje,
Haji Ramathan Mugalu eyali Ssaabawandiisi wa UMSC ne Justus Kyabahwa eyagula ettaka lye Sembabule ku buwumbi busatu n’obukadde 500.
Bannamateeka baakulembeddwa pulezidenti waabwe Ali Kankaka, Erias Luyimbaazi Nalukoola owamawulire ne Siraje Katantazi akulira enzirukanya y’emirimu. Mu mpaaba baategeezezza nti abawaaabirwa bonna baali mu kkobaane ly’okutwala emmaali y’obusiraamu kye bava baakola endagaano etunda nga June 24, 2020.
Bakyesigamya ku kuba nti Mubajje yali akimanyidde ddala nti ettaka ly’e Ssembabule baali baaligabako liizi, kuliko abasenze nga bakimanyi nti bye baali bakola byali tebiyinza kussibwa mu nkola mu nnaku 60.
Baasabye kkooti erangirire nti endagaano y’okutunda yalimu ekkobaane ly’okwagala okwezza emmaali y’Obusiraamu era balagire abawawaabirwa basasule ssente ezibabanjibwa so si kutunda byabugagga bya UMSC.
Bino byonna bisanze UMSC eri mu kkooti ejulirwamu ng’ewakanya Justus Kyabahwa eyabasinga edda omusango era kkooti n’emulagira okutunda ebyobugagga bya UMSC asobole okwesasula obuwumbi 19 ze baabalirira zaalina okufuna olw’obutafuna ttaka nga bwe kyali mu ndagaano.
Kyabahwa singa olwa December 24, 2023 lutuuka nga tannasasulwa ssente z’abanja ajja kutunda ebyobugagga asobole okwesasula ssente z’abanja okuli; Plot 30 ku William Street mu Kampala, plot 23-25 ku Old Kampala (okuli ekitebe kya UMSC), Kyadondo Block 195 plot 5463, ettaka ly’e Kyanja (kuliko apartments), mailo y’ettaka esangibwa e Bukwe mu disitulikiti y’e Hoima ne yiika emu eri e Lumbas mu disitulikiti y’e Jinja.
Poloti esangibwa mu City y’e Mbale, emigabo mu Uganda Ranchers Limited ne Commercial Holdings Limited abalina mailo z’ettaka ebbiri ezisangibwa e Migyera-Buluri ne poloti eri e Ntebe okuliraana Victoria Mall.