Emisango gy'okukuma omuliro n'okwokya gyeyongedde - poliisi

Bya Godfrey Kigobero

POLIISI egambye nti emisango gy'okukuma omuliro n'okwokya , gyeyongedde nnyo mu kiseera kino era n'alabula abantu okugula  ebyuma ebiyamba okuguzikiriza.

E Kasese, omuliro gwakutte essomero lya Brain stream P/S ku Railway Cell era nga kiteeberezebwa nti waliwo abaabadde emabega w'okulyokya.

E Lamwo mu Parabeke , obusiisiira  57 bwayokeddwa ffamire emu eyabadde yeemulugunya ku muwala waabwe omu , gwe baasiba olw'ettemu, kwe kulumba abaamusibisa ne babakola efujjo. Abantu bana baakwatiddwa n'ente 8 ne zinunulwa.

E Katatenga Kaceera e Rakai, abantu babiri, baafiiridde mu muliro. Guno  gwavudde mu sitoowa mwe baabadde batereka amafuta ate ng'eriraanye effumbiro .

Omuliro guno gwabadde mu maka ga Chris Ndugwa 40 era mukyala we Konsira Muhirwa 32 ne muwala waabwe Araish Nakiganda 3, ne bafa.

Omwogezi wa poliisi mu ggwanga, Fred Enanga , agasseeko nti e Kyampisi Mukono, bakyabuuliriza ku muliro ogwakutte cinema Hall ne gusaanyawo ebintu ebiwerako.

Ayongeddeko nti ne Finance Trust e Jinja  nayo yakutte omuliro ebimu ku bintu ne biggya.