Amawulire
Poliisi efulumizza amannya g'abantu abaafiiridde mu lyato eryebbise mu nnyanja Nnalubaale
POLIISI efulumizza amannya g'abantu abaafiiridde mu lyato eryebbise mu nnyanja Nnalubaale , n'agaabo abaataasiddwa.
Patrick Onyango ng'ayogera.
By: Bukedde Omusunsuzi, Journalist @NewVision
Bya Godfrey Kigobero
POLIISI efulumizza amannya g'abantu abaafiridde mu lyato eryebbise mu nnyanja Nnalubaale , n'agaabo abaataasiddwa.
Abafiiridde mu lyato, kuliko: Nnalongo Naluswa ow'e Bussi, Grace 22 ow'e Kapa Kalebi Balabala e Bussi, Lucky 2 ng'abadde mwana w'omugenzi Grace. Emirambo gyabwe gyazuuliddwa eggulo.
Emirambo gy'abalala egikyabuze, kuliko ogwa Emannuel Nsubuga 35 ow'e Kasanje nga ye yabadde avuga eryato, Francis Mundenkye 50, ow'e Bushenyi, Maama Clare nga w'e Kisoro.
Be baataasizza kuliko: Flex Asiimwe, Leticia Akatukwasa, Justine Namata, John Isingoma, Pius Twinamatsiko , Robert Tumusiime, Selestine Maniriho , Simeon Tumuhimbise , Joel Tinkansimire , Aisha Namuyomba ne Frank Galiwango.
Omwogezi wa poliisi mu Kampala, Patrick Onyango, agambye nti eryato lino erya Steven Muragye, eryabadde ligolomolwa Emmannuel Nsubuga, lyasimbudde okuva ku mwalo gwa Balabala okwolekera Nakiwogo eggulo.
Kigambibwa nti bwe lyatuuse mu kitundu kya Kacanga , omuyaga ne gulisika nga n'ekyaddiridde ku bbira. Kwabaddeko abasaabaze 17, enkota z'amatooke nga 200, ensawo za muwogo 7, n'ebintu ebirala.