Omukyala alumiriza Paasita okumuzaalamu omwana n'atamulabirira addukidde ku poliisi lwa kumutiisatiisa

EBY’OMUKAZI  alumiriza pasita okumuzaalamu abaana n’abegaana byongedde okulanda omukazi bw’addukidde ku poliisi n’aggulawo omusango gwa nga alumiriza pasita okutandika okumukubira amasimu agamutisatiisa.

Scovia Kyomuhendo omutuuze we Panda PL e Luzira y’addukidde ku poliisi e Kitintale n’aggulawo omusango ku REF: 25/07/05/2024 nga alumiriza Pasita Stephen Ssekatoogo omusumba w’Ekanisa y’abalokole eya Reformed Bible Church Uganda esangibwa e Iganga okumutulugunya n’okumutisatiisa.

Bino webigyidde kiddiridde Kyomuhendo okulabikira mu mawulire nga addukidde ewa Ssentebe w’ekyalo Joseph Tomusange nga alumiriza Ssekatoogo okwegaana abaana ababiri ku abo abasatu beyamuzaalamu kuno kw’ossa n’obutayagala kumuwa buyambi.

Kyomuhendo ategezezza nga bweyalabidde awo nga Ssekatoogo amukubira essimu nga amutisatiisa bweyamutegeezezza nga ebimwogerwako bwebiri ebijweteke era agenda kumutwala mu kooti aleete obukakafu nti abaana bano ba pasita.

Ono era yamuweze obutaddamu kukuba ku ssimu ye okutuusa nga batuuse mu kooti gy’analeetera obukakafu ku bwanannyini bw’abana bano eri pasita.

Omukyala ng'alina abaana abagambibwa okubeera aba Paasita

Kyomuhendo ategezezza nga Ssekatoogo bw’amukakasizza nga bw’atamulinaako buvunaanyizibwa bwonna nga kino bajja kukikkasiza mu kooti.

Kyomuhendo ategezezza nga embeera eno ey’okumutisatiisa bw’etandise okumutunduzza omutima nga mu kiseera kino tamanyi kiddako.

Wakati mu kusoberwa, Kyomuhendo ategezezza nga yye bw’atalina nsonga ndala yonna gy’ayagaza pasita okuggyako okukkiriza baddemu bagende bakeberebwe omusaayi  nga bombi tebagulinaamu mukono kubanga ayagala abaana bamanye omusaayi gwabwe.

Kyomuhendo ategezezza nga yye bw’ali omwetefuteefu okugenda mu kooti singa wanaba nga y’ewanaava amazima ku nsonga eno.

‘’Njagala Pasita abeere n’omutima ogw’obwa Katonda kubanga amanyi bulungi byonna byetwayogeranga.’’ Kyomuhendo bw’ategezezza.

Awanjagidde bekikwatako bonna omuli Ssabaminisita ,minisita w’abaana n’abavubuka n’abalala bonna bekikwatako okusitukiramu bayingire mu nsonga eno abaana bafune obwenkanya.

Amyuka omwogezi wa Poliisi mu Kampala n’emiriraano Luke Owoyesigyire ategezezza nga poliisi bw’etandise okunoonyereza  ku nsonga eno .

Ategezezza nga bano bwebaggya okuddamu batwalibwe ku DNA  mu ddwaliro lya gavumenti okuzuula ekituufu eky’enkomeredde ku nsonga eno.