BUKEDDE anfudde omulimi ow’ettuttumu

SSAALONGO Henry Lugoloobi ow’e Namulonge mu Wakiso agamba nti, BUKEDDE lwe lupapula lwe olw’amawulire oluganzi, era alwenyumiririzaamu olw’okumufuula omulimi ate era omulunzi ow’ettutumu nga luyita mu muko gwalwo ogwa Enkumbi
terimba ogufuluma buli lwa Mmande.
Lugoloobi agamba nti, omuko gwa Enkumbi Terimba aguganyuddwaamu mu ngeri
za mirundi ebiri ng’okusookera ddala agamba nti, guwandiika ku balimi n’abalunzi ab’enjawulo era ng’aganyuddwa nnyo mu kubasomako. Bano abayigiddeko amagezi n’obukodyo obutali bumu obumuyambye okunywerera mu bulimi n’obulunzi n’efuukira ddala bizinensi ye ate n’agifunamu. Ng’oggyeeko okuwandiika ku balimi n’abalunzi abalala, Lugoloobi agamba nti, naye BUKEDDE azze amuwandiikako n’afulumira ku muko gwayo ogwa Enkumbi Terimba era nga wano we wasinze n’okumufuula ow’ettutumu n’amanyika mu by’obulimi n’obulunzi.
Oluvannyuma lw’abantu okumusomako mu BUKEDDE, azze afuna bakasitoma bangi
abamukubira amasimu nga baagala okubaguza omuddo, amata n’ebintu ebirala by’afulumya ku ffaamu ye. Obumanyifu BUKEDDE bw’amuwadde mu by’obulimi n’obulunzi bw’avaako ne Kabaka okusiima n’amuwa ekifo ky’okubeera omukulembeze
w’ebyobulimi n’obulunzi mu Ssaza lye erya Kyaddondo. Omwaka oguwedde BUKEDDE yamuwandiikako mu mboozi zaayo ez’Omulimi Asinga, era nga yali omu ku bawanguzi ne yeefunira obukadde 30 ate n’aweebwa n’omukisa n’assibwa ku ttiimu y’abalimi eyagenda mu Budaaki gye yayongera okubanguka mu by’obulimi n’obulunzi ate n’akwatagana n’abantu abalina obusobozi obugaziya akatale k’ebintu by’afulumya ku ffaamu ye.