Omubaka Sewungu alaze obwennyamivu olw'abasirikale abaakutte Achileo Kivumbi okkutulamu ssapule ye

AMYUKA sipiika wa Palamenti Thomas Tayebwa yeeyamye okuyingira mu nsonga ey’abebyokwerinda okumenyamenya Ssappule y’akulira eby’okwerinda bya Bobi Wine , Achileo Kivumbi bweyali ayolebwa ab’eby’okwerinda gye buvuddeko.

Kino kidiridde omubaka w’e Kalungu West Joseph Ssewungu okwemulugunya ku bigambibwa nti ab’ebyokwerinda bakwata Ssappule ya Kivumbi ne bagikutula ekintu ekityoboola enzikiriza ye era ekyabenyamiza nga abakatuliki. 

Tayebwa akakasizza nti wakwogerako ne Minisita w’ensonga ez’omunda mu ggwanga kubanga engeri gy'ekwata ku ddiini, ate nga naye mukatuliki, ensonga bwetakwatibwa mungeri ey’obwegenderevu eyinza okuviirako abantu okwegugunga.

Kivumbi yawambibwa abantu abaali mu ngoye ezabulijjo saabiiti ewedde era oluvanyuma  nebayaza amaka ge, ab’ebyokwerinda bategeezza nti basinganayo ebintu eby’efananyiriza ebyambalo bya bannamagye.

Wiiki eno, Kivumbi yasimbiddwa mu Kkooti y’amaje e Makindye wansi wa Ssentebe waayo Brig. Gen. Robert Freeman Mugabe, oludda oluwaabi ne lutegeeza nti Kivumbi yasangibwa n’ennyota z’amagye bbiri.