Abadde amaze ebbanga nga yeefuula omukozi wa kkooti n’afera abantu ssente bamusibye 20!

OMUSAJJA abadde amaze ebbanga nga yefuula omukozi wa kkooti n’aferera abantu okubasabira akakalu ka kkooti akaligiddwa emyezi 20 mu mbuzi ekogga.

Julius Makanga 32 omutuuze w’e Butanza Wobulenzi mu disitulikiti y’e Luweero bulijjo agamyuka b’abeera afeze ge gamumyuse omulamuzi  wa kkooti ya LDC e Makerere Conrad Olobo Oloya bw’amukalize emyezi 20 oluvannyuma lw’okukkiriza omusango gw’okwefuula ky’atali.

Makanga Mu kaduukulu ka kkooti.

Makanga nga August 26, 2024 ku kkooti ya LDC e Makerere yeefuula omukozi w’essiga eddamuzi era ne yeefuula nti asobola okuyamba abantu okubasabira abantu baabwe ne bateerebwa ku kakalu ka kkooti.

Olwakwatibwa Makanga yasimbibwa mu kkooti nákkiriza omusango n’ategeeza nga bwe yali amaze ebbanga nga yeenyigira mu bufere buno n’ategeeza nga  bwabadde akikola okusobola okwebeezaawo.

Okukwatibwa kyaddirira omukazi omu okutemya ku baserikale ba kkooti nga Makanga bw’aferera abantu ku kkooti era yakwatibwa n’atwalibwa ew’omuwaabi wa gavumenti.

Eno omukazi gye yayongera okumulumiriza era nga yasangibwa alina omusajja gwe yali agezaako okuggyako ssente mu ngeri y’emu mutabani we basobole okumukomyawo mu kkooti mu bwangu.

Omulamuzi Olobo yamutegeezezza nga bw’ali ow’omukisa kuba ekibonerezo ekisinga obunene kubeera kusibwa myaka ebiri naye olwókuba yakkiririzaawo omusango n’atayonoona budde bwa kkooti yamusaliddeko ku kibonerezo n’amusiba emyezi 20 asobole okuyiga okwekolera aleme kulowooleza mu kufera bantu.

Bwe yabadde amusalira ekibonerezo omulamuzi Olobo yategeezezza nga ekikolwa kya Makanga bwe kissa essiga eddamuzi mu kifaananyi ekibi eky’okulowozeesa abantu nti kkooti zikolera ku nguzi ne kivaako abantu okulemererwa okuddukira mu kkooti okufuna obwenkanya.