Poliisi ekutte basatu ku by’okuwamba omusuubuzi ne bamala ne bamutta

Poliisi ekutte basatu ku by’okuwamba omusuubuzi ne bamala ne bamutta

Poliisi mu bizinga by’e Buvuma ekutte n’eggalira abasajja babiri n’omukazi omu ku musango gw’okuwamba omusuubuzi ne basaba ensimbi okuva mu baffamire ye oluvannyuma ne bamala ne bamutta.

Ennimiro Mwe Baali Baaziika Nakaziba

Amyuka RDC w’e Buvuma, Patrick Mubiru yategeezezza Bukedde nti omugenzi ye Kasifa Nakaziba 62 ng’abadde musuubuzi wa mmere ng’akolera mu disitulikiti y’e Buvuma ne Kiyindi mu disitulikiti y’e Buikwe.

Mubiru yagambye nti abakwate ye Samuel Ngobi amanyiddwa ennyo nga Rasta 35, omutuuze w’e Lwazi mu ggombolola y’e Busamuzi, Rashid Gadala 47 omutuuze w’e Masese mu kibuga ky’e Jinja ne Annet Nabirye ng’ono muganzi wa Gadala.

Rashid Gadala Ng’ali Ku Mpingu Ku Poliisi Y’e Buvuma.

Kigambibwa nti Abdallah Bogere, mutabani w’omugenzi yeekubira enduulu ku poliisi nga May 23, n’agitegeeza nga nnyina bwe yali awambiddwa abantu abaali batamanyiddwa nga babasaba akakalu ka nsimbi akakadde kamu okusobola okumuta nga baali bakozesa essimu ya Nakaziba yennyini okubakubira amasimu.

“Bwe baalemererwa okuweereza abazigu ensimbi akakadde akamu, baasalako ne basaba emitwalo 50, wabula nazo bwe zaagaana, baamaliriza nga babaweerezza emitwalo etaano.

Zino zaasindikibwa ku nnamba eri mu mannya ga Annet Nabirye, era eno poliisi bwe yagirondodde, yasobodde okukwata Gadala eyabadde nayo n’ategeeza nti Nabirye muganzi we,” amyuka RDC Mubiru bwe yannyonnyodde.

Omulambo Gwa Nakaziba Nga Poliisi Eguzinga Mu Kaveera.

Boogere yategeezezza poliisi nti ebyembi, ne bwe baaweereza ensimbi emitwalo etaano, abazigu abaali bawambye nnyaabwe tebaasobola kumuta oba okubabuulira wa gye baali batadde omulambo, bwe kiba nga baali bamaze okumutta.

Oluvannyuma lw’okukwata Gadala, yategeeza poliisi nti yali akoze ne Samuel Ngobi ng’era Nakaziba baali baamutta nga May 20. Bano baakulembeddemu poliisi ne bagitwala gye baali baaziika Nakaziba mu nnimiro ya lumonde gwe babadde baakasima ku kyalo Lwazi mu ggombolola y’e Busamuzi.

“Omulambo gwa Nakazibwa gwasangiddwa nga gutandise okuvunda kyokka ng’abatemu baamufunya nga bamusibye amagulu n’emikono ne bamuziika mu kinnya oluvannyuma lw’okumutta,” Mubiru bwe yategeezezza.

Oluvannyuma lw’okuziikulayo omulambo, gwatwaliddwa mu ggwanika ly’eddwaliro lya Buvuma Health Centre IV abasawo okugwekebejja. Gadala yategeezezza nti oluvannyuma lw’okuwamba Nakaziba, baamusanga n’ensimbi emitwalo ebiri gyokka ekyabanyiiza ne bamutta.

Kigambibwa nti era abazigu bano baategeezezza poliisi nga bwe baliko omusuubuzi gwe batta okusooka ne babeerako gye baamuziika nga poliisi egenda kulaba nga bayongera okugitegeeza ku bikwata kw’ono na wa gye baamuziika.

RDC asabye abatuuze abayinza okuba nga baliko omuntu waabwe eyabula okutegeeza poliisi ng’oba oly’awo era abazigu bano bayinza okuba bamanyi akakwate ne bababuulirizaako nga tebannatwalibwa mu kkooti kuvunaanibwa.

Wabula era asiimye poliisi y’e Buvuma olw’okwanguwa okukola okunoonyereza oluvannyuma lw’ab’oluganda lw’omugenzi okubategeeza ng’omuntu waabwe bwe yabadde awambiddwa nga kino kye kyayambye okukwata abatemu bano.