UNEB eyongezzaayo ennaku amasomero kwe galina okuweerereza obubonero

EKITONGOLE ky’ebigezo ekya UNEB kyongeddeyo nsalessale w’okuweererezaamu obubonero obuva mu bigezo by’abayizi obukola ebitundu 20 ku 100 obuteekeddwa okuweerezebwa nga tebannatuula ebigezo byabwe eby’akamalirizo.
Nsalessale yabadde wa Mmande nga September 30, n’ayongezebwayo okutuuka nga October 30, 2024 kisobozese amasomero okuweererezaamu obubonero bw’abayizi bonna.
Akulira UNEB, Dan Odongo yagambye nti, kino kyavudde mu kubeera ng’amasomero mangi gabadde tegannaweereza bubonero bw’abayizi.
Ku Mmande ya wiiki eno, obubonero bw’abayizi ebitundu 56 ku 100 bwe bwabadde bwakaweerezebwa.
Abayizi 46 ku 100 baabadde tebannaweereza bubonero ng’ezimu ku nsonga eziweebwa kwe kuba ng’abasomesa bangi babadde tebannannyikira mu nsoma empya.
Ebbanga ly’omwezi ogwayongeddwaamu kisuubirwa nti, lijja kusobozesa obubonero bwa buli muyizi okuweerezebwa.
Okusinziira ku nsoma empya, ebigezo bya UNEB ebyakamalirizo bitwala obubonero bwa bitundu 80 ku 100. Ate ebitundu 20 ku 100 biweerezebwa amasomero nga bayita ku mukutu (Portal) gwa UNEB ogwaweebwa abakulira amasomero.
Odongo yasabye abakulira amasomero obutasitula bubonero bw’abaana mu ngalo okubutwala ku UNEB oba okubuweereza mu ngeri endala yonna eteri ya kubuyisa mu ‘Portal’ ya UNEB.
UNEB egamba nti, tejja kukkiriza kukebera bigezo bya muyizi yenna anaasangibwa nga tebaaweereza bubonero buva mu kugezesebwa okubadde kukolebwa ku masomero.
Ekirungi mu buli ssomero, UNEB egamba yatendeseemu abasomesa 15 ku ngeri y’okububala n’okuweerezaamu obubonero ku ‘Portal’ ya UNEB.
Abakulira amasomero balina okukakasa nti, tebayitibwako nsalessale omupya owa October 30, 2024 kuba tebajja kuweebwa mukisa mulala.
Abazadde n’abayizi bakubiriziddwa okufaayo mu kiseera kino bakakase ng’obubonero bwabwe buweerezebwa mu UNEB mu kifo ky’okulinda ebya UNEB byokka.
Ye akulira ekibiina ekigatta amasomero g’obwannannyini ekya National Private Education Institutions Association, Asadu Kirabira yasabye Gavumenti eyambeko mu kuwa amasomero ebyetaagisa okusomesa ensoma empya.
Yasinzidde ku mukolo gw’okusabira abayizi ba Kiara City High School e Bulaga ku lw’e Mityana.
“Ensoma empya ewa omuyizi ekyanya okusoma nga bw’ayiga by’asobola okukola naye ebyeyambisibwa okutuuka ku kino bigula buwanana. Kimu ku biwaliriza amasomero okwongeza ebisale ate ne kinyiga omuyizi n‘omuzadde,” Kirabira bwe yayogedde.
Ku bigobererwa mu ngolola y’ebibuuzo eby’akamalirizo, Kirabira yagambye nti, “UNEB ebyekuumira nnyo ng’ebyekyama n’etebituusa ku basomesa mu masomero so eby’engolola y’ebibuuzo bitambulira wamu n’ensomesa y’abayizi mu bibiina.”
Omukulu w’essomero, Yusufu Mbeyo yasuubizza abazadde ng’abayizi bwe bajja okuyita obulungi. Okusaba kwakulembeddwa Faaza Deogratius Ssemaluulu ne Imaam w’essomero, Muzamiru Ssempala.