Bannamasaka basiimye Faaza Namukangula

Ab’ekitongole ky’eby’entendereza eky’essaza ly’e Masaka basiimye Faaza Dr Joseph Namukangula (88) olw’okukulaakulanya eby’entendereza mu ssaza nemu Uganda yonna ng’ayita mukuyiiya ennyimba, n’okusomesa abaseminario okuyimba n’okukuba ebivuga.

Omubaka Mpuuga naye abaddewo nnyo

Viika Genero w’e Masaka, Msgr Dominic Ssengooba yeyakwasiza Dr Namukangula ekirabo kye, kumukolo ogwabadde mu Klezia Lutikko e Kitovu ku Mmande nga June 9, 2025.

Bweyabadde ayigiriza mu mmisa ey’okwebaza, Msgr. Ssengooba y’atenderezza nnyo Faaza Namukangula gweyagambye nti muyiiya atasangikasangika, awandiikidde  Klezia ennyimba ennyingi era ennungi, eziyambye Abakristu okutegeera obulungi ekigambo kya Katonda, okukyeebulirirako, ate ggwe wamma n’okutendereza Katonda obulungi.

Akulira ekitongole ky’eby’okuyimba eky’essaza ly’e Masaka, Fr John Bosco Kabanda Faaza Namukangula y’amuyise “Muzira wa Klezia.” Y’amusiimye olw’okufumba obulungi ennyimba, mu stayiro eyaffe ey’Abafrika, ate n’ey’Abazungu eyitibwa “Classical” (soma kkilasiko).

Okusiima Father

Ebitonotono Dr Namukangula

Rev Fr Dr Joseph Namukangula y’omu kubayiiya ba Klezia ab’erinnya. Ali mu luse lumu ne Faaza Dr James Kabuye ow’e Kiyinda-Mityana, n’omugenzi Joseph Kyagambiddwa eyaberanga e Masaka. Bukya atandika kuyiiya nnyimba, emyaka nga 60 emabega, awandiise ennyimba ezisukka mu 1000. Ezisinga okumanyika kuliko Magnificat (Omwoyo gwange gugulumiza Omukama), Mumpita Ani., Omugaati Gw’obulamu, Abasomi Mujje Tusome, Kuuma Nyweza Ekitangaala, n’endala nnyingi.

Eby’okuyimba y’abitadikira mu Semianrio e Bukalasa, nemu Seminario enkulu e Katigondo, kyokka nga oluavnnyuma yagenda mu Germany n’ayongera okukuguka,, era n’avaayo ne ddiguli ey’okusatu (doctorate).

Faaza Namukangula bukya afuan Busaserdooti ebbanga erisnga alimaze mu Seminario e Bukalazsa, gy’asomeserezza abaseminario bangi okuyimba, n’okukuba ebivuga. Asomesezza abantu ab’omugaso nga Dr Nicholas Ssempijja (asomesa mu University e Makerere), Joseph Wasswa (akuba nnanga mu Bugirimaani), Michael Mukasa (mukubi wa nnanga mukibuga Nairobi ekya Kenya), Mw. Jude Luwaga (eyatandikawo Cherubim Chamber Chorale), Omukwasi w’amaloboozi Jude Mugerwa, Mw. Herbert Muyomba, Lawrence Ssemanda, n’abalala bangi.Faaza Namukangula y’asiimye ekirabo eky’amuweereddwa, neyeebaza ab’essaza ly’e Masaka okumusiima ng’akyali mulamu.

Kkwaaya ng'eyimba mmisa

ABALALA 3 NABO BAASIMIDDWA

Abayiiya abalala basatu nabo baasimiddwa. Kubano kwabaddeko Fr Vincent Kateregga (eyayiiya Mujje Baanabange, Bazilio Lumu ne Victoro Mukasa (olutendereza Abasaserdooti Bannauganda ababereberye), Mw. Joseph Yiga (eyayiiya Oh, Oh, Oh Mukama), ne Lawrence Ssemanda.

Kumukolo gwegumu, Rt Hon Mathias Mpuuga (ey’abadde omugenyi omukulu) y’atongozza ekitabo ekirimu ennyimba za Faaza Namukangula. Y’awaddeyo obukadde bw’ensimbi za Uganda 3 okuwagira pulojekiti y’okukuba akatabo kano.

Omukolo gwetabiddwako ne Ssabakristu w’essaza ly’e Masaka, Regina Kitaka, ne Pookino Jude Muleke.

Abaasomerako e Bukalasa abawerako, ngabakulembeddwa Jude Mulinda, nabo baabaddewo era nebatonera Dr Namukangula akakadde k’ensimbi za Uganda 1.

Kkwaya y’essaza ly’e Masaka yeyakulembeddemu okuyimba, ngeyambibwako bbandi ey’amagwala ey’Abaseminario b’e Bukalasa