POLOF. KATEREGGA;Essimu eroopye omugagga w’omu Kampala n’omubaka ku by’ayitamu awaka

EBYA munnabyanjigiriza omugundiivu era omutandisi wa Kampala University Polof. Ambassador AlHajj Badru Ddungu Kateregga bikyali biwanvu bw’azzeemu okulongoosebwa omutwe olw’obuvune bwe yafuna mu maka ge.
Bukedde akitegeddeko nti obuzibu Polof. Kateregga bwe yafuna bw’amutuusibwako omu ku bantu ab’omu nju ye era ensonga zino Polof. yazisiinyaako mu maaso ga Katikkiro wa Buganda Charles Peter Mayiga kyokka teyazirambulula ng’agamba nti ekifo we yali ne Katikkiro si kye kyali ekituufu okuzaasanguza!.
Wabula yannyonnyola Katikkiro nti baamulongoosezza era akyali mu mikono
gy’abasawo abaamuwadde ebbanga ddeneko okussuuka asobole okuddamu okukakkalabya emirimu gye naddala okuddukanya Kampala University erina amatabi amangi mu ggwanga wamu n’e Kenya ne Rwanda. Ensonda mu ffamire zaategeezezza ntiKateregga yazzeemu okulongoosebwa ku Lwokubiri lwa wiiki eno mu ddwaaliro
lya C- Care IHK, eryali liyitibwa International Hospital Kampala e Namuwongo.
Kigambibwa nti kafulu mu kulongoosa emitwe Polof. Joel Kiryabwire ye yazzeemu okukola ku Polof. Kateregga gwe yasooka okulongoosa ku lunaku lw’ameefuga nga October 9, 2024 oluvannyuma lw’okufuna obuzibu awaka. Wabula aba ffamire baategeezezza Bukedde nti okumuzza mu ddwaaliro kyabadde ku Pulogulaamu y’abasawo abaamukozeeko era akyayongera okussuuka.
KATEREGGA AYANJULIRA ABAANA BE ERI ABADDUKANYA YUNIVASITE
Olwavudde mu ddwaaliro, Polof . Kateregga mu kiti kye nga nnannyini Kampala Yunivasite yasitudde abaana n’abanjulira olukiiko olw’oku ntikko olwa Kampala University Council olukulirwa Polof. Syed Ameer Haider Abidi ne wabaawo ebyakkaanyiziddwaako ku nzirukanya ya Yunivasite mu kiseera kino nga Kateregga  mukosefukosefu Nga October 5, 2024 Kateregga yasitul famire ye n’agitwala ku yunivasite ye eyitibwa Kampala University ku ttabi ly’e Jinja n’ayanjulira Katikkiro
wa Buganda, Charles Peter Mayiga, abaana be n’amukaabira n’ebizibu  by’alina awaka.
“Bannange twebaza Katonda olw’obulamu bwange n’obwammwe kubanga okuva nga September 9, 2024 okutuusa kati, ndi mu ddwaaliro”. Kateregga bwe yategeeza Katikkiro.
Yagattako okuggyako enkoofiira y’ekisiraamu n’alaga Katikkiro ebiwundu bibiri ku mutwe nga byateekebwako pulasita.
Mu kiseera kino yaleese abaana be ababadde mu mawanga ga Bulaaya bakomewo batandike okuddukanya bizinensi ye. Yakirabye nga singa tebazibeeramu butereevu, kyangu bizinensi okutwalibwa abantu abalala baatandyagadde.
ESSIMU EROOPYE OMUGAGGA W’OMU KAMPALA N’OMUBAKA
Ensonda zaategeezezza nti, waliwo okunoonyereza okwekyama okugenda mu maaso ng’aba ffamire baagala okuzuula awava obuzibu bwe yafuna awaka n’okulaba engeri Polof. Kateregga gye bayinzaamu omutaasa okuddamu okutuusibwako obuzibu naddala
olw’emyaka gye.
Mu kunoonyereza kuno, kyazuuliddwa nga waliwo omugagga w’omu Kampala n’omubaka wa Palamenti abaludde
nga balina engeri gye beeyingiza mu maka ga Polof. Kateregga wamu ne bizinensi ze.
Omugagga ayogerwako (amannya gasirikiddwa) nga y’omu ku balina ebizimbe mu Kampala kigambibwa nti waliwo amasimu ge baalondoola ne bakizuula ng’alina enkolagana ey’enjawulo esukka ku bya bizinensi ne ffamire ya Kateregga. Enkolagana eno erimu n’okwagala okutwala ebimu ku by’obugagga Kateregga byatuuyanidde okumala ebbanga.
Olwokuba musajja amanyiddwa mu kwenyigira mu ddiiru ez’amaanyi ezirimu okutwala ettaka n’obutitimbe bwa ssente buli gy’akoma okubeera ku lusegere kibeera kyeraliikiriza.
Waliwo owooluganda lwa Kateregga yasabye amannya ge gasirikirwe) eyagambye nti waliwo n’omubaka wa Palamenti ow’omu Kampala gwe beeraliikirira nti yandiba ng’ayingirira nnyo ensonga za ffamire.
Wadde nga Polof. Kateregga alina olubiri lw’ennyumba e Buziga kw’okomya amaaso, ensonda zaategeezezza nti mu kiseera kino takyalinnyayo era bw’aba tali mu ddwaaliro aliko ekifo ekirala w’awummulira, ng’abasawo bwe bamulabirira.
 Omwogezi wa Kampala University, Julius Sekatawa aliko obubaka bwe yafulumizza
ku lwa yunivasite nga baagaliza Polof. Kateregga okussuuka obulungi mu mbeera  y’obulwadde gy’alimu. Obubakabuno yabutadde ku Website ya yunivasite. Kyaddiridde okuba nga tebakyasobola kumutuukako butereevu olwamateeka g’abasawo ate nga n’essimu baamugaanye okugyogererako okumala ebbanga lya myezi esatu