Akabenje kasse omuntu ne kale babiri nga bataawa ; kubaddeko omuserikale

OMUNTU omu afiiriddewo n'abalala babiri okuli omusirikale wa poliisi ne baweebwa ebitanda ng'embeera mbi.

Akabenje akasoose , kagudde ku kyalo Bugogo ku luguudo oluva e Iganga okudda e Kaliro , pikipiki nnamba UFV 022 J Bajaj bw'eyingiridde mmotoka nnamba UBL  566Z Tata loole, okuva emabega, omugoba waayo n'afa.

Afudde ye Hussien Kirunda ng'abadde mutuuze w'e Butabulu e Bugwere , ate gw' abadde aweese n'atuusibwako ebisago eby'amaanyi era nga mu kiseera , tannamanyika ddwaaliro mwe bamujanjabira.

Kigambibwa nti akabenje kano, kavudde ku mugoba wa bodaboda okuyingirira loole eno ebadde etambula empola , ng'agiva emabega era n'afiirawo.

Mu ngeri y'emu era , omuserikale wa poliisi atuusiddwako ebisago eby'amaanyi bw'akooneddwa pikipiki nnamba UFQ 268 X Bajaj  e Busembatya ku luguudo lwa Kibaale, bw’abadde ali ku bigere ng'atambula.

Cpl Hawa Namwabira ng'akolera ku poliisi y'e Busembatya y'ali mu kujanjabibwa olw'obuvune bwe yafunye obw’amaanyi, okusinziira ku mwogezi wa poliisi mu  Busoga East,  Micheal Kafaayo.