Daniella ayongedde okwasa ebyama Chamilli ne yeesika

Daniella Atim ayongedde okwasa ebyama by’amaka gaabwe, ekiwalirizza bba Jose Chameleone okumwegayirira akikomye.

Daniella nga mu kiseera kino ali mu America gy’abeera n’abaana baabwe abataano yayise ku mukutu gwe ogwa X n’ayongera okulombojja ennaku gye yalabira mu bufumbo bwabwe ne Chameleone.

Daniella Bw'afaanana Kati.

Daniella yasooka kuyita mu mukutu gwa You Tube gwe yaggulawo gye buvuddeko n’asuna ku bizibu bba Chameleone ne ffamire bye baamuyisaamu nga bye byamuleetera n’okuwang’angukira mu America gy’abeera kati.

Daniella yategeezezza nti wadde teyali muntu wa ‘Social media’ wabula okuvaayo okwogera ku bye yayitamu akikola okuyamba abakazi abayinza okuba nga bayita mu mbeera nga eyiye okumuyigirako engeri gye bayinza okuva mu bufumbo obw’embirigo nga bwe yalimu.

Yagasseeko nti omwaka oguwedde yawaabira bba ne bamussaako etteeka erimugaana okumusemberera oluvannyuma lw’okumulumba mu America n’amutiisatiisa.

Okumanya Daniella obufumbo bwe yalimu abuwanda lulusu yatuuse n’okugamba nti wadde musanyufu era nga mwetegefu okuddamu okugwa mu mukwano n’omuntu amwagala, yejjusa ebbanga eddene lye yamala ne Chameleone mu bufumbo mw’ataafunira ssanyu wadde!

Chamilli bw'afaanana kati.

Chamilli amwanukudde

Chameleone bwe yatuukiriddwa ku byogerwa mukazi we yagambye nti;

“ Nneewuunyizza Daniella okudda mu lujjudde n’atandika okwogera ku nsonga zino ng’ate akimanyi nti tulina abaana. Kituufu eby’obufumbo bwaffe byafuna obuzibu ate nga ffembi tuvunaanyizibwa ku byatuukawo nga abafumbo.

Ffembi twagezaako okumala emyaka naye ne bigaana. Nze nakkiriza kye yasalawo era ne mmuwa ekitiibwa era bw’aba ng’embeera gy’alimu emusanyusa ekyo kye nsinga okwagala kubanga mmwagaliza ssanyu nga maama w’abaana bange.”

Ku ky’okupanga n’agenda mu America n’atuuka n’okugulayo ennyumba, Chameleone yagambye nti wadde byonna yabikolanga ng’abimukweka naye yali amanyi buli ekigenda mu maaso, wadde yasalawo okusirika.

Yagambye nti ky’amusaba kwe kukkiriza bombi basobole okukuza abaana baabwe abataano. Ku ky’okufuna omukazi omulala, Chameleone yagambye nti; ndi musajja alabika obulungi, nnina abakazi bye beetaaga era ekiseera ekituufu bwe kinaatuuka njakufuna omukyala. Yagambye nti ky’asaba Daniella kwe kukuuma obulamu bwe nga bwa kyama, abuggye ku ‘social media’.