Trump asse abaduumizi b’abatujju mu Somalia

PULEZIDENTI wa America, Donald Trump asumuludde emmundu eyasse abaduumizi b’abatujju b’ekibiina kya ISIS mu Somalia n’ekankanya ne bamasinale ba Iran abeekukumye mu ‘kava’ era tebannadda ngulu.

Ku Lwokutaano ekiro, Trump eyaakamala wiiki bbiri mu ntebe, yaduumidde olutalo ennyonyi ennwanyi ez’amaanyi ne zisituka ku mmeeri USS Harry S. Truman mu liyanja lya Red Sea ne zoolekera Somalia.

Emmeeri Okwabadde Kusimbuka Ennyonyi Za Amerika Ezaakubye.

Olwo eggye lya America erirwanira mu Africa erya United States Africa Command (U.S. AFRICOM), nga ly’erimu ku matabi g’amagye ga America agawera 11 agalwanira ebweru waayo, lyabadde limaze okuketta abaduumizi ba bannalukalala ba ISIS gye baabadde beekukumye.

Okusinziira ku mawulire ga France 24 aga Bufaransa, abaduumizi ba ISIS abo ku ntikko, baabadde beekukumye mu mpuku emu ku zisinga obuwanvu mu ttaka mu bisozisozi bya Golis mountains mu kitundu ekimanyiddwa nga Puntland region mu Somalia.

Eggye lya U.S. AFRICOM olwabakesse, ne likakasa ab’ekitebe kyalyo ekiri mu nkambi ya Kelley Barracks mu kibuga Stuttgart ekya Germany nabo abaagafuuye Trump nti, bannalukalala be yeewerera edda, babagudde mu buufu. Trump yaduumidde lumu nti, ‘Mubakoleko.’

Emu Ku Nfo Omwekukuma Aba Isis Eyakubiddwa.

Ekyo olwawedde, ennyonyi ezaabadde ku mmeeri zaasitukidde mu bibinja 3 nga ziri ssatu-ssatu ne zirumba okukutula misoni.

Zaatuuse okumpi n’agasozi gali ne zitandika okukasuka bbomu ez’amaanyi, ng’ezaasoose zaakoze omulimu gumu kwasaayasa gayinja gaazo agazito.

Ennyonyi ezaasoose bwe zaayasizza agayinja, empuku ne zaasama olwo ekibinja ky’ennyonyi ekyazzeeko ne kitandika okuzikubako mizayiro ezaabadde zeesogga obutereevu empuku ezaasamye omuliro ne gusaasaana wonna mu bannalukalala abaasobeddwa.

Mu kadde kano, abaduumizi ba ISIS ekiggwayo nti, Islamic State of Iraq and Syria ekirwana okufuga ebitundu bya Buwarabu mu mateeka ga Sharia n’okugoba enkola z’Abazungu, baasaasaanye ne baba ng’enjuki ezikubiddwaamu ejjinja naye nga tebalina kye bazzaako okuggyako okuddukira mu gayinja ekitaabadde kyangu.

Abaabadde bakyali abalamu ate ekibinja ky’ennyonyi ekirala, kyagenze ne kibamaliriza nga kibakubamu ebikompola.

Baabadde tebamanyi kibaddewo ate nga n’empuku mwe beekukumye zibikkuse olwo ebikompola ne mizayiro nga bibakuba butereevu nga bw’olaba oluyiira olukutte ekyalo, ettale n’amayumba nga byonna biteta.

Ng’olulumba luwezezza eddakiika nga ziizo ng’ennyonyi zibookya nga n’ensozi zikwatiridde ebimyanso ebyabadde byefaanaanyiriza fayawakisi ezaaniriza omwaka, abatujju baategedde nti America y’ebalumbye ne bagezaako okukuba ennyonyi kyokka ng’ezibakuba z’ezibulawo mangu era tewali n’emu gye baakoonyeeko.

America yasinze kukozesa nnyonyi kika kya F-15 Eagle Air Superiority Fighter Jets. Okusinziira ku mukutu gwa Wikipedia, zikolebwa kkampuni ya America eya McDonnell Douglas.

Ze zaasinze okwesigika ku misoni eyo olw’emisinde emingi gye zirina, ze zisinga okukasuka ekika kya bbomu ezaakozeseddwa ate nga zebongera bulungi mu bisozisozi ng’ebyo awaabadde empuku ezaalumbiddwa.

Ebimu ku bika bya bbomu ezaayasizza enjazi z’empuku kuliko GBU-28 Class laser-guided bunker busting bomb.Bbomu emu ezitowa kiro 1814 nga zikolebwa kkampuni ya Watervliet Arsenal mu ssaza ly’e New York.

Ng’olulumba luwedde enkeera ku Lwomukaaga, Trump yatadde obubaka ku mukutu gwe ogwa Truth Social nti, ‘Abatujju ababadde batigomya America ne banywanyi baayo bawedde. Tewali muntu wabulijjo yalumiziddwa kubanga ebyuma twakozesezza ebikuba enfo entuufu.”

Amawulire ga BBC gaalaze minisita wa America ow’ebyokwerinda, Pete Hegseth eyalaze nti, nga Trump amaze ‘okutowa wooda,’ ekiragiro kye baakituukirizza nga bakolagana ne Gavumenti ya Somalia era yasoose kutegeezebwako.

Pulezidenti wa Somalia,Hassan Sheikh Mohamud yeebazizza Trump okubakolera ku batujju be yayise abaali baabalemerera.Ku bonna tewali yayogedde mannya ga battiddwa na muwendo gwabwe okuggyako okugamba nti baabadde bangi.