Ensengeka y'obubonero bwa senior 4 etabudde Ababaka

ABABAKA ba palamenti batabuddwa olw’engeri ekitongole ekivunanyizibwa ku bigezo mu ggwanga (UNEB) gyekyagabyemu obubonero bw’abayizi abatuula ebigezo bya S.4 omwaka oguwedde 2024 mu nsoma empya kyoyinza okuyita Curriculum gyebagambye nti tetegerekeka.

Ensonga ereteddwa omubaka wa Kalungu West Joseph Ssewungu agambye nti bweyebuuzizza ku mukyala we engeri gyebasengesemu ebibuuzo nga byonna tebitegeerekea.

Ssewungu era agambye ekiriwo kyatabudde amasomero nga tewali amanyi butya bwebagenda kusengeka bayizi abagenda mu A level.

Omubaka omukyala owa Gulu City – Betty Aol Ochan agambye luli babadde basobola okumanya nti omuyizi agudde naye nga kati ensega ebuuzabuuza nga abantu bababuuza kiki kyebagenda okukolera abafunye zi E.

Ababaka nga beemulugunya

Akulira oludda oluvuganya mu palamenti Joel Ssenyonyi agambye nti ekyettabbu n’abazadde abaasasula Fees nabo tebategeera baana babwe byebasoomye era amasimu gabafuukidde amasimu ng’ababuuza nabo byebatamanyi kyokka nga n’abasomesa benyini tebabitegeera.

Minisita omubeezi ow’ebyenjigiriza ebisokerwako Dr. Moriku Joyce  Kaducu yeyamye okwanjulira Palamenti ekiwandiiko ekirambika obulungi engeri obubonero jebwagabiddwamu mu Curriculumu empya mu bigezo ebyakafuluma ebya S.4  ku lw’okubiri lwa sabiiti ejja.

Sipiika Anita Among awadde Ababaka amagezi mbu bwebanamaliriza okutegeera engeri obubonero gyebwagabiddwamu, baddeyo mu bitundu byebakiikirira, basomese abazadde n’abasomesa nabo babitegeere.