Abasiraamu bali mu kaweefube w'okutaasa obutonde bw'ensi

Aba Uganda Muslim Supreme Council (UMSC) bali mu kaweefube wakusiimba emiti 2,000,000 (obukadde bubiri) mu bbanga lya myaka etaano mu kaweefube w’okutaasa n’okuzzaawo obutonde bw’ensi.

Akulira abavubuka mu UMSC, Mustapha Habib ye yategeezezza bwati bwe yabadde asiima emirimu egikolebwa ekibiina kya Energizing Solutions ekikulirwa Hajat Aphwa Sebyala olwa kaweefube gwe kikoze okutumbula obutonde nga kikubiriza abantu okusiimba emiti kati emyaka 16.

Aba Supreme Council nga basimba emiti

Babadde ku muzigiti wa Kampalamukadde n’agamba nti Obusiraamu bwasalawo okulwanirira obutonde nga bakubiriza buli muzigiti okusimbibwako emiti naddala egy’ebibala.

Bano bombi bagabidde abantu 100 emiti ne basiimba n’omuti gumu ku muzigiti oluvannyuma lw’okusaala Juma.

“Tukubiriza abantu okukendeeza okufumbisa enku wamu n’okwokya amaanda bakozese ago agava mu kasasiro awamu n’ebifumba ebirala ng’amasannyalaze ne gaasi. Abakuba bbulooka mu ntobazi, abalimamu n’abazimbamu nabo battattanye nnyo obutonde. Muzimbise bbulooka ez’omusenyu n’obutaziimba mu ntobazzi,” bwe yalambise.

Yagambye nti UMSC yasalawo okusimba emiti 2,000,000 (obukadde bubiri) mu kyama etaano.

Ye Hajat Sebyala asomesezza abantu okufukirira emiti nga bakozesa amazzi agatonnya okuva mu bucupa bwa pulasitiika mu biseera eby’ekyeya emiti gireme kukala.

“Tuleese enkola ennyangu okufukirira emiti. Pulojekiti yaffe yaakusimba emiti 1,000,000 (akakadde kamu) nga mu myaka 16 twakasimba 500,000 (emitwalo ataano),” bwe yategeezezza.

Osimba emiti

Energizing Solution ne UMSC baakusimba emiti 3,000,000 mu myaka etaano mu maaso.

Akulidde kkutubba mu kusaala e Kampalamukadde, Imran Abdunoor Ssali agambye nti kkulaani ekitundu ekisooka ku kanyinyriri akokusatu (Chapter 1 Verse 3) ekubiriza okusiimba emiti era nti obulamu mu nsi buli mu bintu ebya kiragala.

“Bw’osiimba omuti omuntu oba ekinyonyi n’ekisolo ne birya ofuna empeera nnene,” bwe yalambise.

Yakubirizza n’abantu okwettanira bbanka y’obusiraamu eyatandise okukola.