Equity Bank ewadde Vision Group obukadde 30 okuyambako mu nteekateeka z'empaka z’ennyimba za Bajulizi

EQUITY bank ewaddeyo obukadde 30, ziyambeko mu nteekateeka z'empaka z’ennyimba za Bajulizi ezigenda okubaawo enkya nga tujjukira olunaku lw'Abajulizi e Namugongo.

Empaka zino ezituumiddwa 'National Martyrs' Choral Festival ' zirimu kkwaya Mukaaga  okuli Our Lady seat of Wisdom S S Choir , All Saints Choir , St. Charles Lwanga Lubaga Cathedral Choir , Rwenzori Diocese Kampala Fellowship Choir , Morning Glory ne Shepherd's Choir.

Omusunsuzi ow'oku ntikko, Kaija (ku kkono) ng'afuna ceeke ya bukadde 30 okuva ew'akulira bakitunzi ba Equity Clare Tumwesigye (owookubiri ku kkono), addiriddwa Relationship Maneja Religious banking,Samuel Kazooba ne John Bosco Nuwagaba, akulira Religious Banking Sector.

Ez'abakatuliki ssatu n'Abakristaayo ssatu era nga ku buli ludda , kkwaya empanguzi zaakufuna ebirabo bya bukadde 36.

Ttiimu ya Equity bank abaawomye omutwe mu mpaka zino ezitegekebwa Vision Group, ekulembeddwamu akulira bakitunzi Clare Tumwesigye, era ng'awerekeddwako John Bosco Nuwagaba , Kazooba n'abalala.

Nuwagaba agambye nti bw’obeera ne ssente nga tomanyi Katonda, tezibaamu mukisa y'ensonga lwaki, baavayo okuwagira empaka zino n'ebintu ebirala ebirimu eddiini okusobola okuzimba emyoyo gy'abantu.

Barbara Kaija omusunsuzi wa Vision Group ow’oku ntikko, era nga y’akiikiridde agikulira Don Wannyama, asiimye aba Equity bank olw'obuwagizi era n'akunga Bannayuganda okugenda mu bungi ku Serena Hotel enkya, okulaba ku nnyimba.

Annyonnyodde nti okuyingira kwa  50,000/ ate ng'emmeeza ya bukadde bubiri. Kkwaya nnyingi eziyingidde mu mpaka era ne bagenda nga basunsulamu. Empaka zikulemberwa okulamaga okunaabaawo ku Lwokubiri nga June 3 e Namugongo.