Omusuubuzi agambibwa okwefuulira omukyala eyamuwola obukadde 18 n'amutta,poliisi emukutte

POLIISI e Mukono, ekutte omusuubuzi ku bigambibwa nti yeefuulidde omukyala ayamuwola ssente n'amufumita ebisso ebimuttidde mu mmotoka.

Elvis Katabaazi nga mutuuze w'e Nabuti e Mukono , y'akuumirwa ku poliisi eyo, ku bigambibwa nti yeefuulidde Hamidah Mutesi Nalule ow'e Bajjo Seeta e Mukono,  n'amufumita ebiso ebyamusse, olw'ebbanja ery'obukadde 18

Nalule kigambibwa nti abadde akola ogw'okuwola abantu ssente , era gye buvuddeko , yawola Katabaazi obukadde 18 z'abadde amubanja.

Baabadde bombi, batambulira mu mmotoka y'ekika kya Fielder nnamba UBR 759V era nga baasoose wa ssentebe wa LC 1 okulaba engeri gye baabadde balina okugonjoola ensasula y'ebbanja lino nti kyokka ne batamusangayo.

Kigambibwa nti mu kuddayo, mmotoka mwe baabadde batambulira , baagikyamizza ku luguudo lw'e Namuyenje mu kasiko gye baamufumitidde ebiso ne bamuttira mu mmotoka.

Amyuka omwogezi wa poliisi mu Kampala, Luke Owoyesigyire, ategeezezza nti ekiso ekyakozeseddwa, nakyo bakifunye ng'okubuuliriza bwe kugenda mu maaso.