Kitalo! Omusuubuzi bamusanze afiiridde mu dduuka lye ng'avaamu omusaayi

WABADDEWO ekyekango, omusuubuzi bw'afiiridde mu dduuka e Mukono ku makya leero

Peter Olwenyi omutuuze w'e Kigombya South e Namumira Mukono, ng'atunda mata,  y'asangiddwa munda mu dduuka nga mufu era nga mu kiseera kino, omulambo gutwaliddwa okwekebejjebwa.

Amyuka omwogezi wa poliisi mu Kampala n’emiriraano,  Luke Owoyesigyire agambye nti omulambo gubadde guvaamu omusaayi mu kamwa.

Ate embwa ya poliisi e Kawempe eriko gw'ekutte ku bigambibwa nti ye ne banne abalala, bayingiridde amaka g'omukazi ne bamunyagako ssente n'ebintu ebiwerako.

Jonathan Ssekandi y'akwatiddwa ate ye munne Sula Sako mmeeya anoonyezebwa nga babalumiriza okwenyigira mu kubba omukazi Christine nga beeyambisa obwambe.