Poliisi ekutte 9 ku by'okubba ebintu bya masannyalaze!

ABANTU mwenda bakwatiddwa mu bikwekweto ebikoleddwa mu bitundu eby'enjawulo ku babba ebintu by'amasannyalaze.

Ekimu ku bikwekweto kyabadde Katale ku luguudo oluva e Matugga okudda e Semuto mwe baakwatidde emmotoka nnamba UBL 406 B egambibwa okubaamu ebibbe era Farook Kazibwe 21 ow'e Kavule Gombe nga mukugu mu by'amasannyalaze naye n’akwatibwa.

Omwogezi wa poliisi mu ggwanga, Kituuma Rusoke, agambye nti ebikwekweto ebirala byakoleddwa e Mukono n'awalala.

Mu ngeri y'emu era ente 27 ezigambibwa okuba enzibe zizuuliddwa wamu n'embuzi 11 ne bakwata abagambibwa okuba ababbi 18 e Karamoja.