Omuyizi agambibwa okuba mu kkobaane ly'okusalako omuwala obulago ne bamunyagako essimu ne ssente bamusanze atolokera Kenya

OMUVUBUKA omulala agambibwa okwekobaana ne munne ne basala omuwala obulago ne bamunyagako essimu ne ssente, amaze n'akwatibwa.

Kiddiridde abavubuka babiri, okufumbiikiriza omuwala Jane Nambuya 1,8 eyabadde ava okugula amanda ekiro, ne bamusala obulago ne bamunyagako essimu ne ssente emitwalo 50,000/ .

Ettemu lyabadde mu Busajjabwankuba cell mu Namunsi ward mu kibuga ky'e Mbale mu wiiki ewedde.

Abatuuze beekozeemu omulimu ne bafumbiikirizaako omu eyategeerekeseeko erya Muhammad ne bamukuba ne bamutta oluvannyuma lw'okumusanga n'essimu y'omugenzi awamu n'ekiso nga kivulubanye omusaayi, munne n'adduka.

Olwaleero, poliisi y'e Manafwa ekutte omuyizi wa ssiniya (amannya galekeddwa) nga wa myaka 16 agambibwa okuba mu ttemu lino era nga kigambibwa nti omuvubuka ono mutuuze w'e Bunanika mu ggombolola y'e Butoto e Manafwa , baamukutte egezaako kuyingira ggwanga lya Kenya.

Omwogezi wa poliisi e Mbale Rogers Taitika, ategeezezza nti ono baludde nga bamuyigga era okunoonyereza, kugenda mu maaso.