Pulezidenti Museveni atadde omukono ku nnongoosereza mu tteeka lya UPDF

PULEZIDENTI Museveni atadde omukono ku tteeka lya UPDF Amendment Act eriwa kkooti z’amagye obuyinza okuwozesa abantu ba bulijjo.

Etteeka lino eryayisibwa Palamenti gye buvuddeko liwa kkooti z’amagye obuyinza okuwozesa abantu ba bulijjo ababa basangiddwa n’ebyokulwanyisa by’amagye oba abakolagana n’abamagye mu bumenyi bw’amateeka.

Kkooti y’amagye eyasooka okuggyibwawo kkooti ensukkulumu, ku mulundi guno ekomyewo ng’eteereddwaamu ennongoosereza. Okugeza abalamuzi abagituulako bajja kubeeranga bannamateeka abakugu abawoleza mu kkooti enkulu.

Etteeka lino mu kuliyisa lyawakanyizibwa nnyo bannabyabufuzi b’oludda oluvuganya nga bagamba nti lireeteddwa n’ekigendererwa ky’okubakwatirako babasibe. 

Ebitongole ebirwanirizi by’eddembe ly’obuntu nabyo byawakanya etteeka lino nga bagamba nti teryetaagisa kuba Kkooti Ensukkulumu bw’emala okusalawo ku nsonga yonna ate tewali ngeri Palamenti gy’esobola kukiteesaako.

Etteeka ng’oggyeeko ekyokuwozesa abantu ba bulijjo, lirimu ensonga ng’okuwa abaserikale obujjanjabi ababa bakoseddwa nga bali ku mulimu, abaserikale abasajja okufuna ennaku nnya ez’okuwummula nga bakyala baabwe bazadde, okugaziya olukiiko lw’ebyokwerinda olwa High Command n’ebirala bingi.