Abaana 2 abooluganda babuze awaka mu kiseera kye kimu mu ngeri etategeerekeka

Waliwo abazadde e Mityana abali mu maziga oluvannyuma lw’abaana baabwe babiri okubula okuva awaka mu ngeri etategeerekeka nga kati wiiki nnamba eweze nga tebalabikako.

 

Abaana ababuze kuliko Sam  Ssengooba 12, mutabani wa Edward Ssenfuka ne Justine Nalumansi  abatuuze mu katawuni k’omu Ttamu A, mu diviizoni y’e Ttamu mu munisipaali y’e Mityana.

Bazadde ba baana abaabuze.

 
Omulala ye John Zziwa 10, mutabani wa Tonny Ssenyonjo, naye omutuuze w’e Ttamu mu munisipaali y’e Mityana.

 

Nalumansi, nnyina wa Ssengooba yagambye nti abaana baabula ku Lwakutaano lwa wiiki ewedde era nti kw’olwo, baasiiba bombi nga bakola emirimu gy’ewaka bulungi nnyo gyonna gye baali babatuma.

Omwana Zziwa.

 
 “Twabatuma ku luzzi ne bagenda okuleeta amazzi n’okwoza ebidomola, era ne baddayo n’omulundi ogw’okubiri kyokka obudde bwagenze okuziba nga tebalabikako,” Nalumansi bwe yayongeddeko.

 

Abaana bano babadde babeera ku kyalo kimu, nga basomera ku ssomero limu ate nga beerinako oluganda, kubanga omu Nalumansi gw’azaala ayita tata w’omulala (Zziwa) kojja.

 
Nalumansi yategeezezza nti okuva abaana lwe baabula, baaloopa ku poliisi y’e Wabigalo era ne baggulawo ffayiro y’okubula kwabwe eri ku SD REF:13/26/10/025.

 

Yayongeddeko nti bagezezzaako okunoonyaako mu byalo ebibeetoolodde, mu tawuni y’e Mityana n’ebweru waayo kyokka abaana bakyabuze.
 
Asabye omuntu yenna amanyi amayitire g’abaana bano abayambeko okubategeeza ku ssimu 0754570654 oba okuloopa ku poliisi ebali okumpi.

Ffayiro y'omusango gwe baggula ku poliisi

 
Zziwa, kitaawe w’omwana Zziwa omulala eyabuze yalaze obweraliikirivu nti abaana bano bayinza okutambula ne bagenda mu bitundu eby’ewala kubanga bwe baali bava ewaka waliwo ne ssente ezaabula, nga kiteeberezebwa nti bandiba nga be baazitwala.

 
 “Waaliwo emitwalo 15 ze tutaasangawo ne tulowooza nti bayinza okuba be baazitwala ate ekiyinza okubeera eky’obulabe kubanga omuntu ayinza okwagala okuzibabbako n’abatuusaako obulabe,” bw’atyo bwe yayongeddeko.

 
Yagambye nti beewunyizza nnyo engeri abaana baabwe gye baabuzeemu kubanga babadde bakkakkamu nnyo awaka era nga tebalina buzibu nabo.

Sam bw'afaanana.

 
Ssentebe we kyalo ky’e Ttamu A, Aloysius Ssonko yagambye nti abazadde baamutegeeza era n’abasindika ku poliisi okuggulawo ffayiro.

 
Omwogezi wa Poliisi mu bendo bendo ly’e Wamala, Rachael Kawala yagambye nti agenda kusooka kulondoola nsonga nga tannabaako ky’ayogera ku kino.