Christopher Kalyesubula alondeddwa ku bwa Katikkiro w'ekika ky'Endiga omuggya

OMUKULU w'ekika ky'endiga Omutaka Lwomwa Eria Buzaabo Lwasi alonze Christopher Kalyesubula nga Katikkiro w'ekika Omuggya mu nkyukakyuka zaagambye zigendereddwamu okwongera sipiidi mu mirimu gy'ekika.

Lwasi yamusabye okutandikirawo emirimu naddala Okukunga abazzukkulu okwenyigira mu Pulojekiti ezitwala ekika mu maaso.

Omutaka Walusimbi Yusuf Mbirozankya ng'ayogera

Okulangirira kuno kw'abadde ku Butaka bw'ekika kino obusangibwa e Mbaale- Mpigi mu ssaza ly'e Mawokota ku Lwomukaaga ku mukolo abazzukkulu kwebalamagidde okulaba omulimu gw'okuzimba Myuziyamu bwekuyimiridde.

Kalyesubula nga ye Mukulu w'essomero li Lubiri Nnaabagereka P/S y'abadde Omukubirizza w'Olukiiko lw'ekika ky'endiga, azze mu bigere bya Fredrick Ssekubunga eyasabye okuwummula olw'emirimu gyalina e Bungereza.

Omugenyi omukulu ku mukolo guno abadde Omukulu w'ekika ky'effumbe Omutaka Walusimbi Yusuf Mbirozankya akunze abaami okwongera amaanyi mu kuzaala okwaaza ebika n'Obuganda okutwalira awamu.

Omumyuka wa Katikkiro ye Paul Kiyingi, Omukubirizza w’olukiiko ye John Ssebwaato ng’amyukibwa Lawrence Lutalo Kasakya, Omuwandiisi ye Robert Nviiri ng’amyukibwa Charles Sserunkuma. Omuwanika ye James Mwesigwa Bbosa, ow’amawulire ye Lydia Nakiguli owa Bukedde n’abalala.

Omutaka Lwomwa ng'alambuza abazzukkulu omulimu ogukolebwa ku Myuziyamu

Omutaka Lwomwa yalambuza abazzukkulu ebyo ebyakakolebwa ku Myuziyaamu eryabbulwamu Kibuuka Omumbaale n'asaba abazzukkulu bongere okuwaayo ku mulimu guno.

Abazzukkulu bawereddwa emisomo egy'enjawulo egikwata ku buwangwa, ennono, n'enkulakulana oguwereddwa Charles Zziwa Kayindi nga ye Katikkiro w'ekika ky'Enkusu, embeera ababeera ebweru gyebayinza okukuumamu ennono ogutuusiddwa Omukulu Bewaayo Bbosa.

Ye eyaliko Minisita e Mmengo Ssewava Sserubiri eyakikkiridde Minisita  omubeezi owa Tekinologiya mu ggwanga, Joyce Nabbosa yalaze Obukulu bw'amaka mu Buganda okuddamu okukola obugagga obw'ensibo okuyita mu kulunda n'obulimi nga bwekyabeeranga edda naye nga Kati abantu tebalina wadde enkoko emu awaka, naye ne bakaaba obwavu.