Bye wasubiddwa mu Mbuutu y'embuutukizi Luvookwaya e Wankulukuku

MUSA Kabugo okuva mu ssaza lya Ssabasajja Kabaka ery'e Buddu ye nnantameggwa w'Ekigwo Ggumbya Sinziggu 2025.

Ono awangudde ekyapa ky'ettaka okuva mu bavujjirizi aba Info-Trust Property Services nga yamaze kuwangula Steven Kyeyune, okuva e Busiro ku fayinolo era ya yaweereddwa pikipiki okuva mu ba Zongshen mu Ndeeba.

Ssuuna Ben naye yabaddeyo ng'atabula omuziki.

Zaagenze okuwera ssaawa emubez'oku makya ng'abakontanyi 12, bamaze okutuuka e Wankulukuku mu Mbuutu y'Embuutikizi Luvookwaya okusobola okumeggana mu Kigwo Ggumbya Sinziggu.

Bano bazze n’abawagizi okuva mu masaza gaabwe okubabugiriza. Ku ssaawa mukaaga gwennyini Rajab Kyaka, eyabadde omusazi w’empaka yabayise ne bayingira ensiike. 

Karole Kasita n'omuwagizi ku siteegi bwe yabadde ali ku siteegi.

Abavujjirizi okuli aba MTN, Zongshen, Info Trust Property Services Ltd, UEDCL nga bali wamu n’abatwala Bukedde baalambudde olunyiri lw’abakontanyi.

Oluvannyuma Kyaka yabasomedde amateeka agafuga omuzannyo guno era ne bakwata obululu buli omu gw’agenda okumeggana naye. 

Enkalu ne ziryoka zinoonya obukongovvule nga buli omu ayolesa amaanyi n'obukodyo. Abamegganyi 4 be baayiseeko ku bano okugenda ku mutendera gwa semi okwabadde; Stephen Kyeyune ow’e Busiro, Musa Kabugo okuva e Buddu, Denise Jjuuko okuva e Kyadondo ne Lawrence Tamale okuva e Gomba.

Abazze mu mbuutu nga bazinira ku muziki gwa Henry Mwanje

Kabugo ne Kyeyune be batuuse ku fayinolo era bano beeraze eryanyi wakati mu kuwaga n’enduulu ey’oluleekereeke okuva mu bawagizi era gye byaggweeredde nga Kabugo amezze Kyeyune.

Fayinolo z'ekigwo olwawedde olwo Embuutu y'Embuutikizi Luvokwaya n’etandika abantu ne bakuba ppate paka kkejenge.

Waasooseewo abayimbi abatandika abaakubye abantu omuziki ne banyumirwa. Abayimbi abanene okwabadde Aidah Mugo, Henry Mwanje n'abalala nabo baakibye abantu  endongo ne banyumirwa.