Omujaasi asse omuntu mu bbaala mu Kampala

OMUSAJJA agambibwa okuba omujaasi yayingidde ebbaala ya Green Africa Bar (Top Pub) ku William Street mu Kampala n’acakala ne be yasanzeemu nga bw’azannya ‘ppuulu’ gye byakkidde ng’avudde mu mbeera n’akuba omukozi waamwo amasasi n’afa.
Olwo bwabadde bukya eggulo ku Lwokubiri, amasasi bwe gaavuze, abacakaze n’abalala abaagibaddemu ne babuna emiwabo.
Omusajja ateeberezebwa okubeera omujaasi, yayingidde n’emmundu ekika kya baasitoola mu bbaala eno ne wabaawo abaamulabye nayo ne batakitwala nga kikulu.
Omu ku bakola mu bbaala eno, Muhammad Kigozi yagambye nti, omusajja yabadde alina gw’azannya naye ‘ppuulu’ ne bafunamu obutakkaanya, munne n’amulekawo n’agenda.
Nti munne bwe yagenze, omusajja gwe baategeddeko erya Roger, n’agenda mu kiyigo ne yeesibiramu nga mukozi munnaabwe gwe bamanyiiko erya Emma, ng’akola gwa kusiimuula kifo kino n’ebiyigo byakyo n’agendayo okulongoosa.
Emma abadde yaakamalawo emyezi ng’ebiri, yakonkonye alabe oba munda waliyo omuntu kyokka omujaasi eyabadde munda, yamwanukuzza masasi agamuttiddewo amalala ne gakwata ebisenge.
Yategeezezza nti, embeera eno, yavuddeko bonna abaabadde mu bbaala okubuna emiwabo kuba omusajja yabadde akyakuba amasasi nga wano munnaabwe omu we yaddukidde ku poliisi okunona abaserikale.
Bwe baatuseewo embeera n’ebalemerera kwe kuyita aba miritale, abaamukutte ne bamutAbaserikalewala.
Abaserikale okuva ku poliisi ya CPS baagenze ku bbaala eno ne babaako bye baatutte naddala kompyuta okusobola okuggyako ebifaananyi ebyakwatiddwa kkamera z’ebbaala.
POLIISI KY’EGAMBA
Omwogezi wa poliisi mu Kampala n’emirirwano, Rachael Kawala yagambye nti, lipooti poliisi gye yafunye eraga nti, omusajja eyabadde n’emmundu, yagenze ku bbaala eno ku ssaawa 8:30 ez’ekiro.
Yagasseeko nti, eyakoze lipoota yagambye nti, omusajja yagenzeeyo n’agula eby’okunywa omwabadde omwenge n’azannya ne ppuulu nga bwe yamalirizza n’agenda mu kiyigo ne yeesibirayo. Alongoosa bwe yagenzeeyo n’akonkona, yamukubye amasasi banne we baamusanze ng’ali mu kitaba ky’omusaayi.
Omulambo gw’eyattiddwa, poliisi yagututte mu ggwanika e MulagoMu May 2009, omujaasi Pte. Julius Mucunguzi ow’eggye erikuuma pulezidenti yatta abantu 9.
Mu 2014 nga October 6, ku bbaala y’emu, omuserikale akolera mu kitongole ekikuumi eky’obwannannyini, Deogratias Illikori yakuba kanyama Johnson Rukondo eyali amanyiddwa nga Koma amasasi agaamuttirawo n’okulumya abantu abalala abaddusibwa mu ddwaaliro e Mulago nga bataawa