Bitamazire aziikibwa leero e Butambala

OMUBAKA wa Paapa, Ssaabasumba Dr. Augustine Kasujja atenderezza omugenzi Hon. Geraldine Namirembe Bitamazire olw’obuweereza bwe obw’ettendo, bw’akoledde mu Klezia n’eggwanga.
Yamusiimye n’okugunjula obulungi abaana, n’anokolayo Polofeesa Dr. Edrin Kyamanywa nga kati ye Vice-Chancellor wa Uganda Martyrs University Nkozi, ng’omu ku baana be abateeketeeke obulungi.
“Klezia efiiriddwa Omukristu waayo omugundiivu, Uganda nayo efiiriddwa nnyo kubanga omugenzi abadde ayagala nnyo ensi ye, era agiweerezza bulungi nga omusomesa, ate oluvannyuma nga minista w’ebyenjigiriza,” Kasujja bwe yagambye bwe yabadde ayigiriza mu mmisa ey’okusabira omugenzi, mu Lutikko e Lubaga ku Lwokubiri.
Mmisa eno yagiyimbidde wamu ne Viika Genero Msgr. Rogers Kabuye Mukasa, Bwanamukulu wa Lutikko Fr. Achilles Mayanja, Ssaabawandiisi w’olukiko lw’Abeepiskoopi ba Uganda Msgr. John Baptist Kauta, n’Abosodooti abalala bangi.
Polof. Dr. Edrin Kyamwanywa, eyayogedde ku lw’abaana, nnyina yamwogeddeko nga omuzadde omulungi, eyayagala buli mwana we mu ngeri ey’enjawulo, era n’amuyamba okubeera omuntu ow’omugaso.
Ssaabasumba w’Essaza ekkulu ery’e Kampala, Paulo Ssemogerere naye yaweerezza obubaka obukubagiza, era n’atendereza omugenzi.
Omugenzi aziikwa leero e Kibuggu-Masaakwa, mu Butambala. Emikolo gyakutandika ne mmisa ku ssaawa 4.