Engeri okulonda akalulu mu bitundu by'e Nakawa gye gutambudde!

OKULONDA mu bitundu bya Nakawa eby’enjawulo kubadde kwa kimpoowooze era abantu tebalabise bulungi bw’ogeraageranya n’okulonda okuzze kubaawo.

Okulonda kusoose kutaataaganyizibwamu ekire ky’enkuba ekedde okutonnya newankubadde ng’oluvannyuma ekedde.

Nubian Li ng'abuuza ku bantu

Kyokka okwawukanako ne ku mulundi oguwedde, leero bakozesezza buuma obwateekebwawo okweyambisibwa mu kulonda era abantu balonze bulungi awatali kutaataaganyizibwa nnyo.

Ebbugumu mu kalulu k’e Nakawa lisinze ku kifo ky’obwammeeya ng’abeesimbyewo buli omu yeesunga kuwangula.

Paul Mugambe nga ye mmeeya w’e Nakawa aliko kati era nga y’akomyewo okuvuganya ku kifo kino, alondedde mu Agaati zzooni e Luzira era oluvannyuma lw’okulonda aweze nga bw’agenda okufuba okulaba ng’akola ku bwetaavu bw’abantu b’e Nakawa nga n’okusingira ddala ensonga z’ettaka ezisumbuwa abatuuze.

Mmeeya Mugambe ng'azze okulonda

Ali Buken amanyiddwa nga Nubian Li nga naye avuganya ku kifo ky’obwammeeya w’e Nakawa alondedde ku ssomero lya Perfect Primary School e Kulambiro era olumaze okulonda n’asuubiza nga bw’agenda okuyimirirawo ku nsonga eziruma abatuuze zonna.

E Mutungo mu zzooni IV abalonzi bajjumbidde era omu ku beesimbyewo ku bwakkansala mu kitundu kino, Robert Muteesaasira ategeezezza nga okulonda bwe kutabaddemu nnyo buvuyo kyokka n’asaba abavunaanyizibwa ku by’okulonda okubeera abenkanya nga balangirira ebyo ebituufu ebivudde mu kulonda.

E Kyambogo ku Waterford abalonzi tebajjumbidde bulungi era omu ku batuuze mu kitundu Edrine Ssenkuba, ategeezezza nga kino bwe kivudde ku buuma obukozesebwa mu kulonda okusooka okugaana okukola nga kino kitaataaganyizza okulonda newankubadde nga bumaze ne bukola oluvannyuma.