Kazambi asattiza abasuubuzi b'omu Kampala

KAZAMBI ayita mu nguudo  ez’enjawulo  mu Kampala  atedde abasuubuzi  ne  mu bulabe nga beraliikirira okukwatibwa  endwadde  eziva ku bucaafu.

Kazambi esinze kwejirisiza ku luguudo lwa Kafumbe Mukasa  mu Kisenyi  ng’akulukutira butereevu mu mmaali y’abasuubuzi abatunda eby’okulya ku luguudo luno,.
Emidumu gy'akazambi  emirala  ekiyita ku ngulu giri  mmanju wa  Namirembe Road ku Blue-Room  era nga wano akulukutrira  mu bifo awatundirwa  eby’okulya  n’okunywa  nga kino kitadde obulamu bw’abantu  mu matigga.

Ebimu ku bifo ebirimu kazambi

Joseph Senfuka  nga musuubuzi wa birime ku luguudo lwa  Kafumbe Mukasa mu Kisenyi mu Kampala  yategeezezza ku Lwokuna  ku makya nti kazambi amaze ennaku bbiri ng’ayita ku ngulu mu kifo kino.

Yagambye bagezezzaako okutuukirira aba KCCA wamu n’ekitomngole ky’amazzi ne kazambi ku nsonga  eno wabula nga kati ziweze ennaku bbiri nga tewanabaawo kikolebwa.

Ye Amina Namukasa  nga naye musuubuzi wa birime emabega wa Namirembe Road yagambye  emidumu gya kazambi mu kitundu kino buli enkuba  bw’etonnya  ennyingi  ng’atandika okuyita kungulu wabula ng’agenda butereevu mu basuubuzi.

Kazambi

“Kyewunyisa  okuba ng’ebifo ebisinga  okubaamu  kazambi ayita kungulu  biri mu basuubuzi ba byakulya . Gavumenti bwetaaveeyo  kwonganga buzibu buno Kamapala ayolekedde okuzindibwa endwadde z’obuligo omuli ne kkolera.” Namukasa bweyagambye.

Samuel Apedel omwogezi w’ekitongole ky’amazzi ne kazambi  yagambye nti  bagenda kusindika ba yinginiya baabwe mu bwangu ddala  okulba nga  ng’obuzibu buno babasalira amagezi.