Bakyusizza obukulembeze bwa Rotary of Mukono ne Mukono Centra

Eyaliko gavana wa Rotary, Rosette Nabbumba Nayenga asiimye bannalotale abawaddeyo obuyambi okukira ku bannaabwe ne bafuuka ba Paul Harris Fellow (PHF). Bannalotale bano bawaddeyo ddoola 1000 mu kittavu kya Rotary eky'ensi yonna ekya Rotary Fund.

Gavana Nabbumba bano abasiimidde ku mukolo gw'okukyusa obukulembeze bwa 'club' bbiri okubadde eya Mukono ne Mukono Central, nga gubadde ku Colline Hotel.

Cathy Namoma y'agenda okufuuka pulezidenti owa 11 owa Rotary club ya Mukono Central, ate Nasur Wananda  ye pulezidenti owa 37 owa club ya Mukono. Ekisanja kyabwe kitandiika nga 1 July. Club ya Mukono ye yatandiikawo eya Mukono Central.

Gavana Rosette Nabbumba ng'ayanjulira bannalotale Cathy Namoma oluvannyuma lw'okutongozebwa.

Wananda addidde Albert Mooli Sibuta mu bigere abadde pulezidenti wa Mukono, ye Isaac Ssamba y'abadde akulembera aba Mukono Central.

Nasur Wananda oluvannyuma lw'okutongozebwa, yeeyamye okutumbula club eno wamu n'okugitunda mu bitundu ebirala ebiri wabweru wa Mukono. Ono agambye nti wakusosoowaza nnyo ebyokwerinda by'oku nguudo, okulwanyisa obulwadde bwa kkookolo wamu n'obujjanjabi obulala, era n'asaba aba Club ye bakulembere bonna.

Abafuuse ba PHF oluvannyuma lw'okutongozebwa

Ono era ategeezezza nti wadde 'club' ye ekoze pulojekiti nnyinji mu kitundu kyabwe, kyokka era waakukola pulojekiti endala wabweru wa Mukono okusobola okugitunda mu bitundu ebirala, wamu n'okwongera ku ba memba mu club eno.

Ye Cathy Namoma ng'ono mulwanirizi w'abaana abatulugunyizibwa n'abo abakakiddwa omukwano, yeeyamye bino okubitwala mu maaso n'okudduukirira abaana bano naddala abo abatalina mwasirizi. Ono era asuubizza okutwala club mu maaso ng'ayongereza ku pulojekiti ezikoleddwa gw'adidde mu bigere.  Bano buli omu ayanjudde olukiiko lwe bagenda okukola nabo. Ye abadde pulezidenti wa Mukono, Mooli sibuta asiimye bakoze nabo nabakwasa ebirabo.

Baasaze keeki okujaguza obukulembeze obuggya