Abasuubuzi b’akatale mu Nyendo tebakkaanyizza

ABASUUBUZI mu katale k’e Nyendo bataamye nga bawakanya akakiiko k’ebyokulonda mu katale kano okwagala okubasibako abakulembeze ababaddeko  be balumiriza nti balemereddwa okutambuza emirimu obulungi.
Kiddiridde akakiiko k’ebyokulonda akakulemberwa Grace Kisakye,  Nnaalongo Kiweewa n’abalala okutegeka okulonda abakulembeze abaggya ab’abasuubuzi mu katale kano oluvannyuma lw’ekisanja ky’ababaddeko okuggwaako. Abasuubuzi basoose kuteeka ssentebe abaddeko, Kyobe Mutebi ku nninga abannyonnyole ensimbi z’abadde akung’aanya mu basuubuzi ky’abadde azikozesa. Kyobe mu kwewozaako yategeezezza  nga ensimbi ezimu bwe yazikozesa mu kugulira abasuubuzi yunifoomu n’emirimu egitali gimu ekitaamatizza abamu ku basuubuzi bano.
Wabula abasuubuzi abali ku kiwayi kya ssentebe Kyobe nabo baalumbye bannaabwe abawakanya obukulembeze bw’omuntu waabwe nga bagamba tebalina buyinza bumusoya ebibuuzo kuba tebamanyiddwa mu katale kano, ekyayongedde okusajjula embeera. Grace Kisakye ne banne baasazeewo okusoma amannya g’abo abeewandiisizza
okuvuganya kyokka abasuubuzi kyababuuseeko agamu ku mannya g’abakulembeze be balumiriza okulemererwa okutuukiriza obuvunaanyizibwa obwabaweebwa ate okusomebwa mu g’abavuganya ku bifo bye bimu. Kino kyayongedde okutabula embeera ng’abamu bagamba okulonda kugende mu maaso ate abalala nga bakuwakanya era gye
byaggweeredde nga kugudde butaka anti abamu beekandazze ne baamuka akatale watati mu kutolotooma