Ebikwasizza abakozi ba Palamenti
NAKAMYAKALIISOLIISO wa Gavumenti akutte omwogezi wa Palamenti, Chris Obore, n’abakozi abalala musanvu abagambibwa okweyambisa obubi ofiisi n’okubulankanya ssente z’omuwi w’omusolo eziri mu buwumbi mu kiseera eyali sipiika Anita Among we yabeerera mu ofiisi.
Chameleone Abayimiridde mu kaguli ka kkooti okuva ku kkono ye; Chris Obore, Adiro, Okema, Kaaya, Okwi, Otebata ne
NAKAMYA
KALIISOLIISO wa Gavumenti akutte omwogezi wa Palamenti, Chris Obore, n’abakozi abalala musanvu abagambibwa okweyambisa obubi ofiisi n’okubulankanya ssente z’omuwi w’omusolo eziri mu buwumbi mu kiseera eyali sipiika Anita Among we yabeerera mu ofiisi.
Abakwate bonna baggyiddwa eggulo ku Palamenti ne basooka batwalibwa ku ofiisi za kaliisoliiso ezisangibwa ku luguudo lwa Parliamentary Avenue, gye baggyiddwa oluvannyuma ne batwalibwa mu kkooti ewozesa emisango gy’enguzi n’obulyake.
BASINDIKIDDWA KU LIMANDA OKUTUUKA JULY 7
Omuwaabi wa Gavumenti, Daisy Acio, yasabye omulamuzi agira akuumira abakwate mu kkomera nga bwe bamaliriza okunoonyereza kuba bwe banaaba ebweru basobola okukutaataaganya.
Bannamateeka b’abawawaabirwa baasabye abasibe baleme kusibwa bbanga ddene kuba baagala kuteekamu okusaba kwabwe beeyimirirwe.
Bagguddwaako emisango gy’okweyambisa obubi ofiisi zaabwe ne babulankanya ssente z’omuwi w’omusolo eziri mu buwumbi. Kyokka akakunizo abasibe ke balina ka kubeera ng’ogumu ku musango ogubavunaanibwa ogw’okutambuza ssente mu bukyamu ogwa ‘money laundering’ teguwulirwa kkooti mwe baatwaliddwa.
Abakozi ba Palamenti okukwatibwa kiddiridde okunoonyereza okubadde kugenda mu maaso okuva eyali Sipiika Anita Among bwe yaggyibwa mu ofiisi mu kikwekweto ekyazingiramu okwaza amaka ge ag’enjawulo mwe baakwatira ebizibiti eby’enjawulo ne bitwalibwa ku kitebe kya poliisi e Naggulu. Abakwate babalumiriza okweyambisa ebifo byabwe ne bayisaako ssente eziri mu buwumbi ku akawunti zaabwe mu ngeri eteri nnambulukufu ekintu ekikontana n’etteeka erirwanyisa obuli bw’enguzi erya Anti-Corruption Act, Cap 116.
BAVUNAANIDDWA GWA KUBULANKANYA SSENTE EZIRI MU BUWUMBI
Okusinziira ku mpaaba, Bukedde gye yalabyeko eriko omukono gwa Kaliisoliiso;
l Aisha Naluzze Batala, bamulumiriza Obore okubulankanya 5,253,100,000/- wakati wa 2023 ne 2026.
l Daniel Adilo kigambibwa nti wakati wa 2023 ne 2026 ng’akulira abakozi yabulankanya 14,608,613,150/-
l Ye Leonard Okema naye bamulumiriza okubuzaawo 3,489,400,000/- wakati wa 2023 ne 2026 we yabeerera nga y’addukanya ofiisi ya Sipiika wa Palamenti.
l Obore ng’ali wamu ne Okema, Adilo, Rajab Kaaya, Otebata ne Murebe kigambibwa beekobaana ne beewa ssente eziwera 10,893,071,150 nga bakimanyi bulungi nti ziri mu bumenyi bw’amateeka.
l Otebata nga yeeyambisa ekifo kye ekya capacity Development Officer kigambibwa nti yabuzaawo 5,253,100,000/-.
l Rajab Kaaya nga Principal Research Officer owa Palamenti kigambibwa nti yabulankanya 2,170,108,000/-
Ensonda zaategeezezza nti obujulizi Kaliisoliiso bwe yakung’aanya bwe baayaza amaka ga Among ne ofiisi ye ku Palamenti, gattako ofiisi y’akulira enzirukanya y’emirimu, Adolf Mwesige, n’akulira ebyensimbi, Patrick Kunobwa naye bonna tewali yagguddwaako musango.
OMUYIGGO GWATANDIKIRA KU AMONG
Okunoonyereza ku buli bw’enguzi ku Palamenti n’okwegaggawaza gwatandikira ku yali Sipiika Anita Among nga May 16, 2026.
Okuva olwo ebitongole ebinoonyereza okuli ekya Crime Intelligence, amagye, ofiisi ya Kaliisoliisi wa Gavumenti n‘ebirala baazingako amaka ga Among ag’enjawulo okuli; ag’e Nakasero, Kigo, Ntinda ne Bukedea ne baggyayo ebizibiti eby’enjawulo omwali n’emmotoka ez’ebbeeyi mukaaga okuli ne ya Rolls-Royce ebalirirwamu obuwumbi obusatu n’obukadde 500.
Palamenti yennyini nayo baagirumba ne babaako ebiwandiiko ebikulu bye baggyayo ng’ebimu biraga engeri abakozi gye babadde bafunamu ssente z’ekitongole mu ngeri eteri nnambulukufu.
Omuyiggo oluvannyuma gwadda ku bakozi ba Palamenti nga waliwo okwebuuza engeri abawera 319 gye baafunamu emirimu okuva mu 2021 nga tegisoose kulangibwa mu kyapa kya Gavumenti (Gazzete) n’empapula z’amawulire nga bwe kirambikiddwa mu tteeka. Baakoma okulanga mu 2016.