Ebavuddeko omuliro ogwayokezza Ivory Hotel e Nansana

NABBAMBULA w’omuliro eyakutte wooteeri ya Ivory e Nansana, yasanyizzaawo ebintu ebiwerako, n’ereka n’ekizimbe ng’ebitundu ebimu biri yegeyege.

Abaserikale N'abatuuze Nga Beetegereza Ebintu Ebyayonoonese

Poliisi we yatuukidde n’ebimotoka ebizikiza omuliro, gwabadde tegunnaba kukkirira wansi, nga gukyali ku myaliiro egya waggulu. Baagenze okumala okuguzikiza, ng’ebitanda, emifaliso, engoye, TV ne kalonda omulala yenna eyabadde mu nnyumba z’abakozi nga muyonga.

Abatuuze be twayogeddeko nabo, baalaze obutali bumativu olw’amasannyalaze agasusse okuvaavaako nga buli lwe gakomawo gabeera mangi nnyo, ekiviirako ebintu by’amasannyalaze okwokebwa, era nga balowooza nti omuliro guno gwaleeteddwa kuvaavaako kwa masannyalaze.

Ow’amasannyalaze eyaleeteddwa okugaggyako mu kitundu okutuusa ng’omuliro guzikidde, yagambye nti ekizimbe kya wooteeri eno, baluddewo okuddamu okwekebejja amasannyalaze, ate nga emyaka giyiseewo mingi bukya bakiteekamu waya z’amasannyalaze.

Olw’okuba waya zikaddiwa, ono agamba nti emikisa mingi nga kye kyavuddeko omuliro guno. Mmeeya wa Nansana Division, Samuel Mugabi yagambye nti embeera w’etuuse, beetaaga bittanka by’amazzi mu Nansana agasobola okweyambisibwa singa wabaawo obubenje nga buno obw’omuliro.

Omutuuze Keith Ssali yasabye abazimba amayumba mu Nansana okuteekawo amakubo emmotoka ezizikiza omuliro we zisobola okuyita singa wabaawo omuliro.

Amyuka RDC w’e Nansana, Charles Lwanga yeebazizza poliisi eyayanguye okujja n’ezikiza omuliro guno mu budde, kuba ebintu bingi ebyandisanyeewo singa poliisi teyazze mu budde.

Maneja w’ekifo kino Andrew Kayiwa yagambye nti omuliro gwavudde ku masannyalaze, kyokka n’agumya bakasitoma baabwe nti wooteeri yonna teyayidde nga bwe kyasoose okulowoozebwa. Yeebazizza poliisi ezikiza omuliro olw’obwangu bwe yayolesezza. 

Amyuka omwogezi wa poliisi mu Kampala n’emiriraano Luke Owoyesigyire yagambye nti poliisi ekyanoonyereza ku nsonga eno.