Kiyitiridde ku ssomero nga baaniriza Mr. Bukedde eyawangudde emmotoka

Bya Patrick KIbirango 

ASHIRAF Lule 26, ayawangudde mmotoka ya Mr. Bukedde eyavudde ku ssomero gy’asomesa ng’akuuta nfudu azzeeyo nga yeevuga era katono essanyu litte basomesa banne n’abayizi.

Emirimu ku ssomero gyayimiriddemu okumala akaseera abasomesa n’abayizi ne bafubutuka mu bibiina okusanyukirako munnaabwe gwe babadde bayita Masita T nga kati baamuwadde lya Maasita Mr. Bukedde.

Lule asomesa ku ssomero lya Twin Brook Nursery and Primary School e Kiteezi nga musomesa wa katemba n’ennyimba.

Lule Mu Nkofiira Ng'ajaganya N'abayizi N'abasomesa Be Ku Ssomero Lya Twinbrook Kiteezi Baasomesa Mdd

Abayizi Nga Bajaganya Ne Lule

Kiwedde

Yalangiriddwa ku Buwanguzi ku Ssande ekiro ku kitebe kya Vision Group oluvannyuma lw’okuttunka ne banne 10 bwe babadde babbinkana mu mpaka ezimaze emyezi esatu.

Mary Elizabeth Ndagire ye yawangudde ekya Miss Bukedde naye n’aweebwa mmotokka Toyota Cienta n’ekyapa ky’ettaka.

Dayirekita w’essomero, Halimah Mbogo Nabiira yagambye nti baamanyirawo nti Lule empaka wa kuzeetikka kubanga alina ebitone era tebeewuunyizza ng’awangudde.

Lule yagambye nti ennaku zokka ze yaakamala ku kifo kya Mr. Bukedde obulamu bwe bukyuse nga yafuuse dda ssereebu anti buli w’ayita n’abaserikale ku nguudo bamuyimiriza ababuuzeeko.