Abatuuse ku Final ya Miss ne Mr Bukedde batwaliddwa mu boot Camp okuwawula amaloboozi

FAYINOLO z’empaka za Miss ne Mr. Bukedde, za ku Ssande eno nga 31^st March ku lunaku lwa paasika nga kigenda kubeera kivvulu ekinyuvu eky’okubeera ku Wonder world e Kansanga.

Abayimbi abamaanyi okuli King Saha, Kalore Kasita, Vinka, Tom Dee, Gasha Mutoni n’abalala okwo gattako bakazanyirizi nga MC Mariach ne ba Merry Heart Tumbeetu bagena kubaayo byonna ku 20,000/- ne 50,000/-

Bo abakontanyi omusanvu abaatuuse ku fayinolo okuli; Rebecca Kusasiira, Praise Wisdom, Godfrey Mukisa, Ketra Nansikombi, Vicent Bbosa Yusuf,Jovia Louis Nabakooza ne Victo Mukasa  batwaliddwa ku woteeri ya The Forest Park Lweza kiyite ‘boot camp’ gye bagenda okumala wiiki nnamba nga bakubwako enfuufu.

Michael Kazinja kalabalaba w’abakontanyi mu boot camp, yanyonnyodde nti abakontanyi bali mu mbeera ebasobozesa okukola okwegezaamu okumala bagende okutuuka ku fayinolo nga bali bulungi era mu ‘boot camp’ bagenda kubeera nga bayambibwako aba bandi ya Vision Publisher.

Abawanguzi Miss ne Mr Bukedde buli omu agenda kufuna agalabo okuli ekyapa ky’ettaka ne ssente 5,000,000/- ate abanakwata eky’okubiri omuwala n’omulenzi buli omu afune 5,000,000/-.

Empaka z’omwaka guno ziwagiddwa aba Njovu Estates Developers e Nansana abaawaddeyo ebyapa by’ettaka by’abawanguzi, Sumz ab’ombumpwankimpwaki, Mariam fashions e Bwaise wamu ne Movit.

Fayinolo z’omulundi guno Bukedde yeegatiddwaako ssaabategesi Norbat Twizire owa Norbat Events okuzitegeka ng’ono yeebazizza Bukedde olw'okumuwa omukisa okutegeka ekivvulu kino